[604] Tena samayena buddho bhagavā bhaggesu viharati susumāragire bhesakalāvane migadāye . tena kho pana samayena bhikkhū hemantike māse aññataraṃ mahantaṃ susirakaṭṭhaṃ jotiṃ samādahitvā visibbesuṃ . Tasmiṃ ca susire kaṇhasappo agginā santatto nikkhamitvā bhikkhū paripātesi . bhikkhū tahiṃ tahiṃ padhāviṃsu . Ye te bhikkhū appicchā .pe. Te ujjhāyanti khīyanti vipācenti kathaṃ hi nāma bhikkhū jotiṃ samādahitvā visibbessantīti .pe. saccaṃ kira bhikkhave bhikkhū jotiṃ samādahitvā visibbentīti . saccaṃ bhagavāti . vigarahi buddho bhagavā kathaṃ hi nāma te bhikkhave moghapurisā jotiṃ samādahitvā visibbessanti netaṃ bhikkhave appasannānaṃ vā pasādāya pasannānaṃ vā bhiyyobhāvāya .pe. evañca pana bhikkhave imaṃ sikkhāpadaṃ uddiseyyātha {604.1} yo pana bhikkhu visīvanāpekkho jotiṃ samādaheyya vā samādahāpeyya vā pācittiyanti. {604.2} Evañcidaṃ bhagavatā bhikkhūnaṃ sikkhāpadaṃ paññattaṃ hoti.

[605] Tena kho pana samayena bhikkhū gilānā honti . Gilānapucchakā bhikkhū gilāne bhikkhū etadavocuṃ kaccāvuso khamanīyaṃ kacci yāpanīyanti . pubbe mayaṃ āvuso jotiṃ samādahitvā visibbema Tena no phāsu hoti idāni pana bhagavatā paṭikkhittanti kukkuccāyantā na visibbema tena no na phāsu hotīti. Bhagavato etamatthaṃ ārocesuṃ. Anujānāmi bhikkhave gilānena bhikkhunā jotiṃ samādahitvā vā samādahāpetvā vā visibbetuṃ evañca pana bhikkhave imaṃ sikkhāpadaṃ uddiseyyātha {605.1} yo pana bhikkhu agilāno visīvanāpekkho jotiṃ samādaheyya vā samādahāpeyya vā pācittiyanti. {605.2} Evañcidaṃ bhagavatā bhikkhūnaṃ sikkhāpadaṃ paññattaṃ hoti.

[606] Tena kho pana samayena bhikkhū padīpepi jotikepi jantāgharepi kukkuccāyanti . bhagavato etamatthaṃ ārocesuṃ. Anujānāmi bhikkhave tathārūpapaccayā jotiṃ samādahituṃ samādahāpetuṃ evañca pana bhikkhave imaṃ sikkhāpadaṃ uddiseyyātha {606.1} yo pana bhikkhu agilāno visīvanāpekkho jotiṃ samādaheyya vā samādahāpeyya vā aññatra tathārūpapaccayā pācittiyanti.