[63] Bhikkhuṃ paneva uddissāti bhikkhussatthāya bhikkhuṃ ārammaṇaṃ karitvā bhikkhuṃ acchādetukāmo . aññātako nāma mātito vā pitito vā yāva sattamā pitāmahayugā asambaddho . gahapati nāma yo koci agāraṃ ajjhāvasati . gahapatānī nāma yā kāci agāraṃ ajjhāvasati . cīvaracetāpanaṃ nāma hiraññaṃ vā suvaṇṇaṃ vā maṇi vā muttā vā masāragallaṃ vā phaliko vā paṭako vā suttaṃ vā kappāso vā . iminā cīvaracetāpanenāti paccupaṭṭhitena . cetāpetvāti parivaṭṭetvā . Acchādessāmīti dassāmi . tatra ce so bhikkhūti yaṃ bhikkhuṃ uddissa cīvaracetāpanaṃ upakkhaṭaṃ hoti so bhikkhu . pubbe appavāritoti pubbe avutto hoti kīdisena te bhante cīvarena attho kīdisaṃ te cīvaraṃ cetāpessāmīti . upasaṅkamitvāti gharaṃ gantvā yattha katthaci Upasaṅkamitvā . cīvare vikappaṃ āpajjeyyāti āyataṃ vā hotu vitthataṃ vā appitaṃ vā saṇhaṃ vā . Iminā cīvaracetāpanenāti paccupaṭṭhitena. Evarūpaṃ vā evarūpaṃ vāti āyataṃ vā vitthataṃ vā appitaṃ vā saṇhaṃ vā. Cetāpetvāti parivaṭṭetvā . acchādehīti dajjehi . kalyāṇakamyataṃ upādāyāti sādhutthiko mahagghatthiko . tassa vacanena āyataṃ vā vitthataṃ vā appitaṃ vā saṇahaṃ vā cetāpeti payoge dukkaṭaṃ paṭilābhena nissaggiyaṃ hoti nissajjitabbaṃ saṅghassa vā gaṇassa vā puggalassa vā. Evañca pana bhikkhave nissajjitabbaṃ .pe. idaṃ me bhante cīvaraṃ pubbe appavārito aññātakaṃ gahapatikaṃ upasaṅkamitvā cīvare vikappaṃ āpannaṃ nissaggiyaṃ imāhaṃ saṅghassa nissajjāmīti .pe. dadeyyāti .pe. Dadeyyunti .pe. Āyasmato dammīti.

[64] Aññātake aññātakasaññī pubbe appavārito gahapatikaṃ upasaṅkamitvā cīvare vikappaṃ āpajjati nissaggiyaṃ pācittiyaṃ . aññātake vematiko pubbe appavārito gahapatikaṃ upasaṅkamitvā cīvare vikappaṃ āpajjati nissaggiyaṃ pācittiyaṃ . Aññātake ñātakasaññī pubbe appavārito gahapatikaṃ upasaṅkamitvā cīvare vikappaṃ āpajjati nissaggiyaṃ pācittiyaṃ . Ñātake aññātakasaññī āpatti dukkaṭassa . ñātake vematiko āpatti dukkaṭassa. Ñātake ñātakasaññī anāpatti.