[644] Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena āyasmā upanando sakyaputto sañcetanikaṃ sukkavisaṭṭhiṃ āpattiṃ āpajjitvā bhātuno saddhivihārikassa bhikkhuno ārocesi ahaṃ āvuso sañcetanikaṃ sukkavisaṭṭhiṃ āpattiṃ āpanno mā kassaci ārocesīti . tena kho pana samayena aññataro bhikkhu sañcetanikaṃ sukkavisaṭṭhiṃ āpattiṃ āpajjitvā saṅghaṃ tassā āpattiyā parivāsaṃ yāci . tassa saṅgho tassā āpattiyā parivāsaṃ adāsi. {644.1} So parivasanto taṃ bhikkhuṃ passitvā etadavoca ahaṃ āvuso sañcetanikaṃ sukkavisaṭṭhiṃ āpattiṃ āpajjitvā saṅghaṃ tassā āpattiyā parivāsaṃ yāciṃ tassa me saṅgho tassā āpattiyā parivāsaṃ adāsi sohaṃ parivasāmi vedayāmahaṃ āvuso vedayatīti maṃ āyasmā dhāretūti . kiṃ nu kho āvuso yo aññopi imaṃ āpattiṃ āpajjati sopi evaṃ karotīti . evamāvusoti. Ayaṃ āvuso āyasmā upanando sakyaputto sañcetanikaṃ sukkavisaṭṭhiṃ āpattiṃ āpajjitvā so me ārocesi ahaṃ āvuso sañcetanikaṃ sukkavisaṭṭhiṃ āpattiṃ āpanno mā kassaci ārocesīti . kiṃ Pana tvaṃ āvuso taṃ āpattiṃ paṭicchādesīti . evamāvusoti . Athakho so bhikkhu bhikkhūnaṃ etamatthaṃ ārocesi . ye te bhikkhū appicchā .pe. te ujjhāyanti khīyanti vipācenti kathaṃ hi nāma bhikkhu bhikkhussa jānaṃ duṭṭhullaṃ āpattiṃ paṭicchādessatīti .pe. saccaṃ kira tvaṃ bhikkhu bhikkhussa jānaṃ duṭṭhallaṃ āpattiṃ paṭicchādesīti . saccaṃ bhagavāti . vigarahi buddho bhagavā kathaṃ hi nāma tvaṃ moghapurisa bhikkhussa jānaṃ duṭṭhullaṃ āpattiṃ paṭicchādessasi netaṃ moghapurisa appasannānaṃ vā pasādāya pasannānaṃ vā bhiyyobhāvāya .pe. evañca pana bhikkhave imaṃ sikkhāpadaṃ uddiseyyātha {644.2} yo pana bhikkhu bhikkhussa jānaṃ duṭṭhullaṃ āpattiṃ paṭicchādeyya pācittiyanti.

[645] Yo panāti yo yādiso .pe. Bhikkhūti .pe. Ayaṃ imasmiṃ atthe adhippeto bhikkhūti . bhikkhussāti aññassa bhikkhussa . jānāti nāma sāmaṃ vā jānāti aññe vā tassa ārocenti so vā āroceti. Duṭṭhullā nāma āpatti cattāri ca pārājikāni terasa ca saṅghādisesā. Paṭicchādeyyāti imaṃ jānitvā codessanti sāressanti khuṃsessanti vambhessanti maṅkuṃ karissanti nārocessāmīti dhuraṃ nikkhittamatte āpatti pācittiyassa.