[759] Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena chabbaggiyā bhikkhū mañcaṃpi pīṭhaṃpi tūlonaddhaṃ kārāpenti . manussā vihāracārikaṃ āhiṇḍantā passitvā ujjhāyanti khīyanti vipācenti kathaṃ hi nāma samaṇā sakyaputtiyā mañcaṃpi pīṭhaṃpi tūlonaddhaṃ kārāpessanti seyyathāpi gihī kāmabhoginoti . assosuṃ kho bhikkhū tesaṃ manussānaṃ ujjhāyantānaṃ khīyantānaṃ vipācentānaṃ . ye te bhikkhū appicchā .pe. te ujjhāyanti khīyanti vipācenti kathaṃ hi nāma chabbaggiyā bhikkhū mañcaṃpi pīṭhaṃpi tūlonaddhaṃ kārāpessantīti .pe. saccaṃ kira tumhe bhikkhave mañcaṃpi pīṭhaṃpi tūlonaddhaṃ kārāpethāti. Saccaṃ bhagavāti. Vigarahi buddho bhagavā kathaṃ hi nāma tumhe moghapurisā mañcaṃpi pīṭhaṃpi tūlonaddhaṃ kārāpessatha netaṃ moghapurisā appasannānaṃ vā pasādāya pasannānaṃ vā bhiyyobhāvāya .pe. evañca pana bhikkhave imaṃ sikkhāpadaṃ uddiseyyātha {759.1} yo pana bhikkhu mañcaṃ vā pīṭhaṃ vā tūlonaddhaṃ kārāpeyya uddālanakaṃ pācittiyanti.

[760] Yo panāti yo yādiso .pe. Bhikkhūti .pe. Ayaṃ imasmiṃ atthe adhippeto bhikkhūti . mañco nāma cattāro mañcā masārako bundikābaddho kuḷirapādako āhaccapādako . Pīṭhaṃ nāma cattāri pīṭhāni masārakaṃ bundikābaddhaṃ kuḷirapādakaṃ āhaccapādakaṃ . tūlaṃ nāma tīṇi tūlāni rukkhatūlaṃ latātūlaṃ potakītūlaṃ . kārāpeyyāti karoti vā kārāpeti vā payoge dukkaṭaṃ paṭilābhena uddāletvā pācittiyaṃ desetabbaṃ.

[761] Attanā vippakataṃ attanā pariyosāpeti āpatti pācittiyassa . attanā vippakataṃ parehi pariyosāpeti āpatti pācittiyassa . parehi vippakataṃ attanā pariyosāpeti āpatti pācittiyassa . parehi vippakataṃ parehi pariyosāpeti āpatti pācittiyassa . aññassatthāya karoti vā kārāpeti vā āpatti dukkaṭassa . aññena kataṃ paṭilabhitvā paribhuñjati āpatti dukkaṭassa.

[762] Anāpatti āyoge kāyabandhanena aṃsabaddhake pattatthavikāya parissāvane bimbohanaṃ karoti aññena kataṃ paṭilabhitvā uddāletvā paribhuñjati ummattakassa ādikammikassāti. Chaṭṭhasikkhāpadaṃ niṭṭhitaṃ. -------