[814] Sāvatthīnidānaṃ . tena kho pana samayena chabbaggiyā bhikkhū kāyappacālakaṃ antaraghare gacchanti kāyaṃ olambentā .pe. {814.1} Na kāyappacālakaṃ antaraghare gamissāmīti sikkhā karaṇīyā na kāyappacālakaṃ antaraghare gantabbaṃ kāyaṃ paggahetvā Gantabbaṃ . yo anādariyaṃ paṭicca kāyappacālakaṃ antaraghare gacchati kāyaṃ olambento āpatti dukkaṭassa. Anāpatti asañcicca asatiyā ajānantassa gilānassa āpadāsu ummattakassa ādikammikassāti.

[815] Sāvatthīnidānaṃ . tena kho pana samayena chabbaggiyā bhikkhū kāyappacālakaṃ antaraghare nisīdanti kāyaṃ olambentā .pe. {815.1} Na kāyappacālakaṃ antaraghare nisīdissāmīti sikkhā karaṇīyā. Na kāyappacālakaṃ antaraghare nisīditabbaṃ kāyaṃ paggahetvā nisīditabbaṃ . yo anādariyaṃ paṭicca kāyappacālakaṃ antaraghare nisīdati kāyaṃ olambento āpatti dukkaṭassa. Anāpatti asañcicca asatiyā ajānantassa gilānassa vāsūpagatassa āpadāsu ummattakassa ādikammikassāti.

[816] Sāvatthīnidānaṃ . tena kho pana samayena chabbaggiyā bhikkhū bāhuppacālakaṃ antaraghare gacchanti bāhuṃ olambentā .pe. {816.1} Na bāhuppacālakaṃ antaraghare gamissāmīti sikkhā karaṇīyā. Na bāhuppacālakaṃ antaraghare gantabbaṃ bāhuṃ paggahetvā gantabbaṃ . yo anādariyaṃ paṭicca bāhuppacālakaṃ antaraghare gacchati bāhuṃ olambento āpatti dukkaṭassa. Anāpatti asañcicca asatiyā ajānantassa gilānassa āpadāsu ummattakassa ādikammikassāti.

[817] Sāvatthīnidānaṃ . tena kho pana samayena chabbaggiyā bhikkhū bāhuppacālakaṃ antaraghare nisīdanti bāhuṃ olambentā .pe. {817.1} Na bāhuppacālakaṃ antaraghare nisīdissāmīti sikkhā karaṇīyā. Na bāhuppacālakaṃ antaraghare nisīditabbaṃ bāhuṃ paggahetvā nisīditabbaṃ . yo anādariyaṃ paṭicca bāhuppacālakaṃ antaraghare nisīdati bāhuṃ olambento āpatti dukkaṭassa. Anāpatti asañcicca asatiyā ajānantassa gilānassa vāsūpagatassa āpadāsu ummattakassa ādikammikassāti.