[824] Sāvatthīnidānaṃ . tena kho pana samayena chabbaggiyā bhikkhū ukkuṭikāya antaraghare gacchanti .pe. {824.1} Na ukkuṭikāya antaraghare gamissāmīti sikkhā karaṇīyā. Na ukkuṭikāya antaraghare gantabbaṃ . yo anādariyaṃ paṭicca ukkuṭikāya antaraghare gacchati āpatti dukkaṭassa. Anāpatti asañcicca asatiyā ajānantassa gilānassa vāsūpagatassa āpadāsu ummattakassa ādikammikassāti.

[825] Sāvatthīnidānaṃ . tena kho pana samayena chabbaggiyā bhikkhū pallatthikāya antaraghare nisīdanti .pe. {825.1} Na pallatthikāya antaraghare nisīdissāmīti sikkhā karaṇīyā. Na pallatthikāya antaraghare nisīditabbaṃ . yo anādariyaṃ paṭicca hatthapallatthikāya vā dussapallatthikāya vā antaraghare nisīdati āpatti dukkaṭassa. Anāpatti asañcicca asatiyā ajānantassa gilānassa vāsūpagatassa āpadāsu ummattakassa ādikammikassāti. Samattiṃsa bhojanappaṭisaṃyuttā

[826] Sāvatthīnidānaṃ . tena kho pana samayena chabbaggiyā bhikkhū asakkaccaṃ piṇḍapātaṃ paṭiggaṇhanti chaḍḍetukāmā viya .pe. {826.1} Sakkaccaṃ piṇḍapātaṃ paṭiggahessāmīti sikkhā karaṇīyā. Sakkaccaṃ piṇḍapāto paṭiggahetabbo . yo anādariyaṃ paṭicca asakkaccaṃ piṇḍapātaṃ paṭiggaṇhāti chaḍḍetukāmo viya āpatti dukkaṭassa. Anāpatti asañcicca asatiyā ajānantassa gilānassa āpadāsu ummattakassa ādikammikassāti.

[827] Sāvatthīnidānaṃ . tena kho pana samayena chabbaggiyā bhikkhū tahaṃ tahaṃ olokentā piṇḍapātaṃ paṭiggaṇhanti ākirantepi atikkantepi na jānanti .pe. {827.1} Pattasaññī piṇḍapātaṃ paṭiggahessāmīti sikkhā karaṇīyā. Pattasaññinā piṇḍapāto paṭiggahetabbo . yo anādariyaṃ paṭicca tahaṃ tahaṃ olokento piṇḍapātaṃ paṭiggaṇhāti āpatti dukkaṭassa. Anāpatti asañcicca asatiyā ajānantassa gilānassa āpadāsu ummattakassa ādikammikassāti.