[834] Sāvatthīnidānaṃ . tena kho pana samayena chabbaggiyā bhikkhū thūpato omadditvā piṇḍapātaṃ bhuñjanti .pe. {834.1} Na thūpato omadditvā piṇḍapātaṃ bhuñjissāmīti sikkhā karaṇīyā. Na thūpato omadditvā piṇḍapāto bhuñjitabbo . yo anādariyaṃ paṭicca thūpato omadditvā piṇḍapātaṃ bhuñjati āpatti dukkaṭassa. Anāpatti asañcicca asatiyā ajānantassa gilānassa parittake sese ekato saṅkaḍḍhitvā omadditvā bhuñjati āpadāsu ummattakassa ādikammikassāti.

[835] Sāvatthīnidānaṃ . tena kho pana samayena chabbaggiyā bhikkhū sūpaṃpi byañjanaṃpi odanena paṭicchādenti bhiyyokamyataṃ upādāya .pe. {835.1} Na sūpaṃ vā byañjanaṃ vā odanena paṭicchādessāmi bhiyyokamyataṃ upādāyāti sikkhā karaṇīyā. Na sūpaṃ vā byañjanaṃ vā odanena paṭicchādetabbaṃ bhiyyokamyataṃ upādāya . yo anādariyaṃ paṭicca sūpaṃ vā byañjanaṃ vā odanena paṭicchādeti bhiyyokamyataṃ upādāya āpatti dukkaṭassa. Anāpatti asañcicca asatiyā ajānantassa sāmikā paṭicchādetvā denti na bhiyyokamyataṃ upādāya āpadāsu Ummattakassa ādikammikassāti.

[836] Sāvatthīnidānaṃ . tena kho pana samayena chabbaggiyā bhikkhū sūpaṃpi odanaṃpi attano atthāya viññāpetvā bhuñjanti . manussā ujjhāyanti khīyanti vipācenti kathaṃ hi nāma samaṇā sakyaputtiyā sūpaṃpi odanaṃpi attano atthāya viññāpetvā bhuñjissanti kassa sampannaṃ na manāpaṃ kassa sāduṃ na ruccatīti . assosuṃ kho bhikkhū tesaṃ manussānaṃ ujjhāyantānaṃ khīyantānaṃ vipācentānaṃ . ye te bhikkhū appicchā .pe. te ujjhāyanti khīyanti vipācenti kathaṃ hi nāma chabbaggiyā bhikkhū sūpaṃpi odanaṃpi attano atthāya viññāpetvā bhuñjissantīti .pe. saccaṃ kira tumhe bhikkhave sūpaṃpi odanaṃpi attano atthāya viññāpetvā bhuñjathāti . saccaṃ bhagavāti . vigarahi buddho bhagavā kathaṃ hi nāma tumhe moghapurisā sūpaṃpi odanaṃpi attano atthāya viññāpetvā bhuñjissatha netaṃ moghapurisā appasannānaṃ vā pasādāya pasannānaṃ vā bhiyyobhāvāya .pe. Evañca pana bhikkhave imaṃ sikkhāpadaṃ uddiseyyātha {836.1} na sūpaṃ vā odanaṃ vā attano atthāya viññāpetvā bhuñjissāmīti sikkhā karaṇīyā. {836.2} Evañcidaṃ bhagavatā bhikkhūnaṃ sikkhāpadaṃ paññattaṃ hoti.