[862] Sāvatthīnidānaṃ . tena kho pana samayena chabbaggiyā bhikkhū pādukārūḷhassa dhammaṃ desenti .pe. {862.1} Na pādukārūḷhassa agilānassa dhammaṃ desessāmīti sikkhā karaṇīyā. Na pādukārūḷhassa agilānassa dhammo desetabbo . yo anādariyaṃ paṭicca akkantassa vā paṭimukkassa vā omukkassa vā agilānassa dhammaṃ deseti āpatti dukkaṭassa. Anāpatti asañcicca asatiyā ajānantassa gilānassa āpadāsu ummattakassa ādikammikassāti.

[863] Sāvatthīnidānaṃ . tena kho pana samayena chabbaggiyā bhikkhū upāhanārūḷhassa dhammaṃ desenti .pe. {863.1} Na upāhanārūḷhassa agilānassa dhammaṃ desessāmīti sikkhā karaṇīyā. Na upāhanārūḷhassa agilānassa dhammo desetabbo . yo anādariyaṃ paṭicca akkantassa vā paṭimukkassa vā omukkassa vā agilānassa dhammaṃ deseti āpatti dukkaṭassa. Anāpatti asañcicca asatiyā ajānantassa gilānassa āpadāsu ummattakassa ādikammikassāti.

[864] Sāvatthīnidānaṃ . tena kho pana samayena chabbaggiyā bhikkhū yānagatassa dhammaṃ desenti .pe. {864.1} Na yānagatassa agilānassa dhammaṃ desessāmīti sikkhā karaṇīyā. Yānaṃ nāma vayhaṃ ratho sakaṭaṃ sandamānikā sivikā pāṭaṅkī . Na yānagatassa agilānassa dhammo desetabbo . yo anādariyaṃ paṭicca yānagatassa agilānassa dhammaṃ deseti āpatti dukkaṭassa. Anāpatti asañcicca asatiyā ajānantassa gilānassa āpadāsu ummattakassa ādikammikassāti.

[865] Sāvatthīnidānaṃ . tena kho pana samayena chabbaggiyā bhikkhū sayanagatassa dhammaṃ desenti .pe. {865.1} Na sayanagatassa agilānassa dhammaṃ desessāmīti sikkhā karaṇīyā. Na sayanagatassa agilānassa dhammo desetabbo . yo anādariyaṃ paṭicca antamaso chamāyaṃpi nipannassa agilānassa dhammaṃ deseti āpatti dukkaṭassa. Anāpatti asañcicca asatiyā ajānantassa gilānassa āpadāsu ummattakassa ādikammikassāti.