[97] Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena aññatarassa bhikkhuno kosalesu janapadesu sāvatthiṃ gacchantassa antarāmagge eḷakalomāni uppajjiṃsu . athakho so bhikkhu tāni eḷakalomāni uttarāsaṅgena bhaṇḍikaṃ bandhitvā agamāsi . manussā taṃ bhikkhuṃ passitvā upphaṇḍesuṃ kittakena te bhante kītāni kittako udayo bhavissatīti . so bhikkhu tehi manussehi upphaṇḍiyamāno maṅku ahosi. Athakho so bhikkhu sāvatthiṃ gantvā tāni eḷakalomāni ṭhitako va āsumbhi . bhikkhū taṃ bhikkhuṃ evamāhaṃsu kissa tvaṃ āvuso imāni eḷakalomāni ṭhitako va āsumbhasīti . tathā hi panāhaṃ āvuso imesaṃ eḷakalomānaṃ kāraṇā manussehi upphaṇḍitoti . kīvadūrato pana tvaṃ āvuso imāni eḷakalomāni āharasīti . Atirekatiyojanaṃ āvusoti. Ye te bhikkhū appicchā .pe. te ujjhāyanti khīyanti vipācenti kathaṃ hi nāma bhikkhu atirekatiyojanaṃ eḷakalomāni āharissatīti. {97.1} Athakho te bhikkhū bhagavato etamatthaṃ ārocesuṃ . Saccaṃ kira tvaṃ bhikkhu atirekatiyojanaṃ eḷakalomāni āharasīti . Saccaṃ bhagavāti . vigarahi buddho bhagavā kathaṃ hi Nāma tvaṃ moghapurisa atirekatiyojanaṃ eḷakalomāni āharissasi netaṃ moghapurisa appasnānaṃ vā pasādāya pasannānaṃ vā bhiyyobhāvāya .pe. Evañca pana bhikkhave imaṃ sikkhāpadaṃ uddiseyyayātha {97.2} bhikkhuno paneva addhānamaggapaṭipannassa eḷakalomāni uppajjeyyuṃ ākaṅkhamānena bhikkhunā paṭiggahetabbāni paṭiggahetvā tiyojanaparamaṃ sahatthā hāretabbāni asante hārake tato ce uttariṃ hareyya asantepi hārake nissaggiyaṃ pācittiyanti.

[98] Bhikkhuno paneva addhānamaggapaṭipannassāti pathaṃ gacchantassa. Eḷakalomāni uppajjeyyunti uppajjeyyuṃ saṅghato vā gaṇato vā ñātito vā mittato vā paṃsukūlato vā attano vā dhanena. Ākaṅkhamānenāti icchamānena paṭiggahetabbāni . paṭiggahetvā tiyojanaparamaṃ sahatthā hāretabbānīti tiyojanaparamatā sahatthā hāretabbāni . asante hāraketi na añño koci hārako hoti itthī vā puriso vā gahaṭṭho vā pabbajito vā . Tato ce uttariṃ hareyya asantepi hāraketi paṭhamaṃ pādaṃ tiyojanaṃ atikkāmeti āpatti dukkaṭassa dutiyaṃ pādaṃ atikkāmeti nissaggiyāni honti antotiyojane ṭhito bahitiyojanaṃ pāteti nissaggiyāni honti aññassa yāne vā bhaṇḍe vā ājānantassa pakkhipitvā tiyojanaṃ atikkāmeti nissaggiyāni honti nissajjitabbāni saṅghassa vā Gaṇassa vā puggalassa vā . evañca pana bhikkhave nissajjitabbāni .pe. imāni me bhante eḷakalomāni tiyojanaṃ atikkāmitāni nissaggiyāni imānāhaṃ saṅghassa nissajjāmīti .pe. dadeyyāti .pe. Dadeyyunti .pe. Āyasmato dammīti.