[130] Tena kho pana samayena chabbaggiyā bhikkhū bhagavatā anuññātaṃ naṭṭhapattassa vā bhinnapattassa vā pattaṃ viññāpetunti te appamattakenapi bhinnena appamattakenapi chiddena appamattakenapi khaṇḍena appamattakenapi vilikhitakena na mattaṃ jānitvā bahū patte Viññāpenti . athakho so kumbhakāro bhikkhūnaṃ tatheva bahū patte karonto na sakkoti aññaṃ vikkāyikaṃ bhaṇḍaṃ kātuṃ attanāpi na yāpeti puttadārāpissa kilamanti . manussā tatheva ujjhāyanti khīyanti vipācenti kathaṃ hi nāma samaṇā sakyaputtiyā na mattaṃ jānitvā bahū patte viññāpessanti ayaṃ imesaṃ bahū patte karonto na sakkoti aññaṃ vikkāyikaṃ bhaṇḍaṃ kātuṃ attanāpi na yāpeti puttadārāpissa kilamantīti. {130.1} Assosuṃ kho bhikkhū tesaṃ manussānaṃ ujjhāyantānaṃ khīyantānaṃ vipācentānaṃ . ye te bhikkhū appicchā .pe. te ujjhāyanti khīyanti vipācenti kathaṃ hi nāma chabbaggiyā bhikkhū appamattakenapi bhinnena appamattakenapi chiddena appamattakenapi khaṇḍena appamattakenapi vilikhitakena na mattaṃ jānitvā bahū patte viññāpessantīti . athakho te bhikkhū bhagavato etamatthaṃ ārocesuṃ. Saccaṃ kira tumhe bhikkhave appamattakenapi bhinnena appamattakenapi chiddena appamattakenapi khaṇḍena appamattakenapi vilikhitakena na mattaṃ jānitvā bahū patte viññāpethāti. Saccaṃ bhagavāti. {130.2} Vigarahi buddho bhagavā kathaṃ hi nāma tumhe moghapurisā appamattakenapi bhinnena appamattakenapi chiddena appamattakenapi khaṇḍena appamattakenapi vilikhitakena na Mattaṃ jānitvā bahū patte viññāpessatha netaṃ moghapurisā appasannānaṃ vā pasādāya pasannānaṃ vā bhiyyobhāvāya .pe. Evañca pana bhikkhave imaṃ sikkhāpadaṃ uddiseyyātha yo pana bhikkhu ūnapañcabandhanena pattena aññaṃ navaṃ pattaṃ cetāpeyya nissaggiyaṃ pācittiyaṃ . tena bhikkhunā so patto bhikkhuparisāya nissajjitabbo. {130.3} Yo ca tassā bhikkhuparisāya pattapariyanto so ca tassa bhikkhuno padātabbo ayante bhikkhu patto yāva bhedanāya dhāretabboti. Ayaṃ tattha sāmīcīti.