[27] Ekakulassa rukkhamūlaṃ hoti yaṃ majjhantike kāle samantā chāyā pharati antochāyāya cīvaraṃ nikkhipitvā antochāyāya vatthabbaṃ. Nānākulassa rukkhamūlaṃ hoti hatthapāsā na vijahitabbaṃ.

[28] Ajjhokāso ekūpacāro nānūpacāro nāma agāmake araññe samantā sattabbhantarā ekūpacāro tato paraṃ nānūpacāro.

[29] Vippavutthe vippavutthasaññī aññatra bhikkhusammatiyā nissaggiyaṃ pācittiyaṃ . vippavutthe vematiko aññatra bhikkhusammatiyā nissaggiyaṃ pācittiyaṃ . vippavutthe avippavutthasaññī aññatra bhikkhusammatiyā nissaggiyaṃ pācittiyaṃ . apaccuddhaṭe paccuddhaṭasaññī aññatra bhikkhusammatiyā nissaggiyaṃ pācittiyaṃ . avissajjite vissajjitasaññī aññatra bhikkhusammatiyā nissaggiyaṃ pācittiyaṃ . Anaṭṭhe naṭṭhasaññī aññatra bhikkhusammatiyā nissaggiyaṃ pācittiyaṃ . Avinaṭṭhe vinaṭṭhasaññī aññatra bhikkhusammatiyā nissaggiyaṃ pācittiyaṃ . Adaḍḍhe daḍḍhasaññī aññatra bhikkhusammatiyā nissaggiyaṃ pācittiyaṃ . Avilutte viluttasaññī aññatra bhikkhusammatiyā nissaggiyaṃ pācittiyaṃ.

[30] Nissaggiyaṃ cīvaraṃ anissajjitvā paribhuñjati āpatti Dukkaṭassa . avippavutthe vippavutthasaññī āpatti dukkaṭassa . Avippavutthe vematiko āpatti dukkaṭassa . avippavutthe avippavutthasaññī anāpatti.