[42] Seyyathāpi bhikkhave sālisūkaṃ vā yavasūkaṃ vā micchāpaṇihitaṃ hatthena vā pādena vā akkantaṃ hatthaṃ vā pādaṃ vā bhijjissati lohitaṃ vā uppādessatīti netaṃ ṭhānaṃ vijjati taṃ kissa hetu micchāpaṇihitattā bhikkhave sālisūkassa evameva kho bhikkhave so vata bhikkhu micchāpaṇihitena cittena avijjaṃ bhijjissati vijjaṃ uppādessati nibbānaṃ sacchikarissatīti netaṃ ṭhānaṃ vijjati taṃ kissa hetu micchāpaṇihitattā bhikkhave cittassāti.

[43] Seyyathāpi bhikkhave sālisūkaṃ vā yavasūkaṃ vā sammāpaṇihitaṃ hatthena vā pādena vā akkantaṃ hatthaṃ vā pādaṃ vā bhijjissati lohitaṃ vā uppādessatīti ṭhānametaṃ vijjati taṃ kissa hetu sammāpaṇihitattā bhikkhave sālisūkassa evameva kho bhikkhave so vata bhikkhu sammāpaṇihitena cittena avijjaṃ bhijjissati vijjaṃ uppādessati nibbānaṃ sacchikarissatīti ṭhānametaṃ vijjati taṃ kissa hetu sammāpaṇihitattā bhikkhave cittassāti.

[44] Idhāhaṃ bhikkhave ekaccaṃ puggalaṃ paduṭṭhacittaṃ evaṃ cetasā ceto paricca pajānāmi imamhi ce ayaṃ samaye puggalo kālaṃ kareyya yathābhataṃ nikkhitto evaṃ niraye taṃ kissa hetu cittaṃ Hissa bhikkhave paduṭṭhaṃ cetopadosahetu ca pana bhikkhave evamidhekacce sattā kāyassa bhedā parammaraṇā apāyaṃ duggatiṃ vinipātaṃ nirayaṃ upapajjantīti.

[45] Idhāhaṃ bhikkhave ekaccaṃ puggalaṃ pasannacittaṃ evaṃ cetasā ceto paricca pajānāmi imamhi ce ayaṃ samaye puggalo kālaṃ kareyya yathābhataṃ nikkhitto evaṃ sagge taṃ kissa hetu cittaṃ hissa bhikkhave pasannaṃ cetopasādahetu ca pana bhikkhave evamidhekacce sattā kāyassa bhedā parammaraṇā sugatiṃ saggaṃ lokaṃ upapajjantīti.