[305] 59 Dveme bhikkhave atthavase sampassamānā kiṃpurisā mānusiṃ vācaṃ na bhāsanti katame dve mā ca musā bhaṇimhā mā ca paraṃ abhūtena abbhācikkhimhāti ime kho bhikkhave dve atthavase sampassamānā kiṃpurisā mānusiṃ vācaṃ na bhāsantīti.

[306] 60 Dvinnaṃ bhikkhave dhammānaṃ atitto appaṭivāṇo mātugāmo kālaṃ karoti katamesaṃ dvinnaṃ methunadhammasamāpattiyā ca vijāyanassa ca imesaṃ kho bhikkhave dvinnaṃ dhammānaṃ atitto appaṭivāṇo mātugāmo kālaṃ karotīti.

[307] 61 Asantasannivāsañca vo bhikkhave desessāmi santasannivāsañca taṃ suṇātha sādhukaṃ manasikarotha bhāsissāmīti . Evaṃ bhanteti kho te bhikkhū bhagavato paccassosuṃ . Bhagavā etadavoca kathañca bhikkhave asantasannivāso hoti kathañca asanto sannivasanti idha bhikkhave therassa bhikkhuno evaṃ hoti theropi maṃ na vadeyya majjhimopi maṃ na vadeyya navopi maṃ na vadeyya theraṃpāhaṃ na vadeyyaṃ majjhimaṃpāhaṃ na vadeyyaṃ navaṃpāhaṃ na vadeyyaṃ thero cepi maṃ vadeyya ahitānukampī maṃ vadeyya no hitānukampī noti naṃ vadeyyaṃ viheseyyaṃpi naṃ passampissa na paṭikareyyaṃ majjhimo cepi maṃ vadeyya ... navo cepi maṃ vadeyya ahitānukampī maṃ vadeyya no hitānukampī noti naṃ vadeyyaṃ viheseyyaṃpi naṃ passampissa Na paṭikareyyaṃ majjhimassapi bhikkhuno evaṃ hoti .pe. navassapi bhikkhuno evaṃ hoti theropi maṃ na vadeyya majjhimopi maṃ na vadeyya navopi maṃ na vadeyya theraṃpāhaṃ na vadeyyaṃ majjhimaṃpāhaṃ na vadeyyaṃ navaṃpāhaṃ na vadeyyaṃ thero cepi maṃ vadeyyaṃ ahitānukampī maṃ vadeyya no hitānukampī noti naṃ vadeyyaṃ viheseyyaṃpi naṃ passampissa na paṭikareyyaṃ majjhimo cepi maṃ vadeyya ... navo cepi maṃ vadeyya ahitānukampī maṃ vadeyya no hitānukampī noti naṃ vadeyyaṃ viheseyyaṃpi naṃ passampissa na paṭikareyyaṃ evaṃ kho bhikkhave asantasannivāso hoti evañca asanto sannivasanti. {307.1} Kathañca bhikkhave santasannivāso hoti kathañca santo sannivasanti idha bhikkhave therassa bhikkhuno evaṃ hoti theropi maṃ vadeyya majjhimopi maṃ vadeyya navopi maṃ vadeyya theraṃpāhaṃ vadeyyaṃ majjhimaṃpāhaṃ vadeyyaṃ navaṃpāhaṃ vadeyyaṃ thero cepi maṃ vadeyya hitānukampī maṃ vadeyya no ahitānukampī sādhūti naṃ vadeyyaṃ na naṃ viheseyyaṃ passampissa paṭikareyyaṃ majjhimo cepi maṃ vadeyya ... Navo cepi maṃ vadeyya hitānukampī maṃ vadeyya no ahitānukampī sādhūti naṃ vadeyyaṃ na naṃ viheseyyaṃ passampissa paṭikareyyaṃ majjhimassapi bhikkhuno evaṃ hoti .pe. navassapi bhikkhuno evaṃ hoti theropi maṃ vadeyya majjhimopi maṃ vadeyya navopi maṃ vadeyya theraṃpāhaṃ vadeyyaṃ majjhimaṃpāhaṃ vadeyyaṃ navaṃpāhaṃ vadeyyaṃ thero cepi maṃ Vadeyya hitānukampī maṃ vadeyya no ahitānukampī sādhūti naṃ vadeyyaṃ na naṃ viheseyyaṃ passampissa paṭikareyyaṃ majjhimo cepi maṃ vadeyya ... navo cepi maṃ vadeyya hitānukampī maṃ vadeyya no ahitānukampī sādhūti naṃ vadeyyaṃ na naṃ viheseyyaṃ passampissa paṭikareyyaṃ evaṃ kho bhikkhave santasannivāso hoti evañca santo sannivasantīti.