[46] Seyyathāpi bhikkhave udakarahado āvilo lulito kalalībhūto tattha cakkhumā puriso tīre ṭhito na passeyya sippisambukampi sakkharakathalampi macchagumbampi carantampi tiṭṭhantampi taṃ kissa hetu āvilattā bhikkhave udakassa evameva kho bhikkhave so vata bhikkhu āvilena cittena attatthaṃ vā ñassati paratthaṃ vā ñassati ubhayatthaṃ vā ñassati uttariṃ vā manussadhammā alamariyañāṇadassanavisesaṃ sacchikarissatīti netaṃ ṭhānaṃ vijjati taṃ kissa hetu āvilattā bhikkhave cittassāti.

[47] Seyyathāpi bhikkhave udakarahado accho vippasanno anāvilo tattha cakkhumā puriso tīre ṭhito passeyya sippisambukampi sakkharakathalampi macchagumbampi carantampi tiṭṭhantampi taṃ kissa hetu anāvilattā bhikkhave udakassa evameva kho bhikkhave so vata bhikkhu Anāvilena cittena attatthaṃ vā ñassati paratthaṃ vā ñassati ubhayatthaṃ vā ñassati uttariṃ vā manussadhammā alamariyañāṇadassanavisesaṃ sacchikarissatīti ṭhānametaṃ vijjati taṃ kissa hetu anāvilattā bhikkhave cittassāti.

[48] Seyyathāpi bhikkhave yānikānici rukkhajātāni candano tesaṃ aggamakkhāyati yadidaṃ mudutāya ceva kammaññatāya ca evameva kho ahaṃ bhikkhave nāññaṃ ekadhammaṃpi samanupassāmi yaṃ evaṃ bhāvitaṃ bahulīkataṃ muduñca hoti kammaniyañca yathayidaṃ bhikkhave cittaṃ cittaṃ bhikkhave bhāvitaṃ bahulīkataṃ muduñca hoti kammaniyañcāti.

[49] Nāhaṃ bhikkhave aññaṃ ekadhammaṃpi samanupassāmi yaṃ evaṃ lahuparivattaṃ yathayidaṃ bhikkhave cittaṃ yāvañcidaṃ bhikkhave upamāpi na sukarā yāva lahuparivattaṃ cittanti.