[459] 20 Tīhi bhikkhave aṅgehi samannāgato pāpaṇiko nacirasseva mahantattaṃ vepullattaṃ pāpuṇāti bhogesu katamehi tīhi idha bhikkhave pāpaṇiko cakkhumā ca hoti vidhūro ca nissayasampanno ca . kathañca bhikkhave pāpaṇiko cakkhumā hoti idha bhikkhave pāpaṇiko paṇiyaṃ jānāti idaṃ paṇiyaṃ evaṃ kītaṃ evaṃ vikkayamānaṃ ettakaṃ mūlaṃ bhavissati ettako udayoti evaṃ kho bhikkhave pāpaṇiko cakkhumā hoti . Kathañca bhikkhave pāpaṇiko vidhūro hoti idha bhikkhave pāpaṇiko kusalo hoti paṇiyaṃ ketuñca vikketuñca evaṃ kho bhikkhave pāpaṇiko vidhūro hoti . kathañca bhikkhave pāpaṇiko nissayasampanno hoti idha Bhikkhave pāpaṇiko ye te gahapatī vā gahapatiputtā vā aḍḍhā mahaddhanā mahābhogā te naṃ evaṃ jānanti ayaṃ kho bhavaṃ pāpaṇiko cakkhumā ca vidhūro ca paṭibalo puttadārañca posetuṃ amhākañca kālena kālaṃ anuppadātunti te naṃ bhogehi nipatanti ito samma pāpaṇika bhoge haritvā puttadārañca posehi amhākañca kālena kālaṃ anuppadehīti evaṃ kho bhikkhave pāpaṇiko nissayasampanno hoti . imehi kho bhikkhave tīhi aṅgehi samannāgato pāpaṇiko nacirasseva mahantattaṃ vepullattaṃ pāpuṇāti bhogesu. {459.1} Evameva kho bhikkhave tīhi dhammehi samannāgato bhikkhu nacirasseva mahantattaṃ vepullattaṃ pāpuṇāti kusalesu dhammesu katamehi tīhi idha bhikkhave bhikkhu cakkhumā ca hoti vidhūro ca nissayasampanno ca . kathañca bhikkhave bhikkhu cakkhumā hoti idha bhikkhave bhikkhu idaṃ dukkhanti yathābhūtaṃ pajānāti ... Ayaṃ dukkhanirodhagāminī paṭipadāti yathābhūtaṃ pajānāti evaṃ kho bhikkhave bhikkhu cakkhumā hoti . kathañca bhikkhave bhikkhu vidhūro hoti idha bhikkhave bhikkhu āraddhaviriyo viharati akusalānaṃ dhammānaṃ pahānāya kusalānaṃ dhammānaṃ upasampadāya thāmavā daḷhaparakkamo anikkhittadhuro kusalesu dhammesu evaṃ kho bhikkhave bhikkhu vidhūro hoti . Kathañca bhikkhave bhikkhu nissayasampanno hoti idha bhikkhave bhikkhu ye te bhikkhū bahussutā āgatāgamā dhammadharā vinayadharā mātikādharā so te kālena kālaṃ upasaṅkamitvā paripucchati Paripañhati idaṃ bhante kathaṃ imassa ko atthoti tassa te āyasmanto avivaṭañceva vivaranti anuttānīkatañca uttānīkaronti anekavihitesu ca kaṅkhāṭhāniyesu dhammesu kaṅkhaṃ paṭivinodenti evaṃ kho bhikkhave bhikkhu nissayasampanno hoti . imehi kho bhikkhave tīhi dhammehi samannāgato bhikkhu nacirasseva mahantattaṃ vepullattaṃ pāpuṇāti kusalesu dhammesūti. Rathakāravaggo dutiyo. Tassuddānaṃ ñātako saraṇīyo bhikkhu cakkavattī pacetano apaṇṇakattā devo ca dve pāpaṇikena cāti. ----------------