[568] 129 Ekaṃ samayaṃ bhagavā bārāṇasiyaṃ viharati isipatane migadāye . athakho bhagavā pubbaṇhasamayaṃ nivāsetvā pattacīvaramādāya bārāṇasiṃ piṇḍāya pāvisi . addasā kho bhagavā goyogamilakkhasmiṃ piṇḍāya caramāno aññataraṃ bhikkhuṃ rittassādaṃ bāhirassādaṃ muṭṭhassatiṃ asampajānaṃ asamāhitaṃ vibbhantacittaṃ pākatindriyaṃ disvā taṃ bhikkhuṃ Etadavoca mā kho tvaṃ bhikkhu attānaṃ kaṭuviyamakāsi taṃ vata bhikkhu kaṭuviyakataṃ attānaṃ āmagandhe avassutaṃ makkhikā nānupatissanti nānvāssavissantīti netaṃ ṭhānaṃ vijjatīti . athakho so bhikkhu bhagavatā iminā ovādena ovadito saṃvegamāpādīti . athakho bhagavā bārāṇasiyaṃ piṇḍāya caritvā pacchābhattaṃ piṇḍapātapaṭikkanto bhikkhū āmantesi idhāhaṃ bhikkhave pubbaṇhasamayaṃ nivāsetvā pattacīvaramādāya bārāṇasiṃ piṇḍāya pāvisiṃ addasiṃ kho ahaṃ bhikkhave goyogamilakkhasmiṃ piṇḍāya caramāno aññataraṃ bhikkhuṃ rittassādaṃ bāhirassādaṃ muṭṭhassatiṃ asampajānaṃ asamāhitaṃ vibbhantacittaṃ pākatindriyaṃ disvā taṃ bhikkhuṃ etadavocaṃ mā kho tvaṃ bhikkhu attānaṃ kaṭuviyamakāsi taṃ vata bhikkhu kaṭuviyakataṃ attānaṃ āmagandhe avassutaṃ makkhikā nānupatissanti nānvāssavissantīti netaṃ ṭhānaṃ vijjatīti athakho so bhikkhave bhikkhu mayā iminā ovādena ovadito saṃvegamāpādīti. {568.1} Evaṃ vutte aññataro bhikkhu bhagavantaṃ etadavoca kinnukho bhante kaṭuviyaṃ ko āmagandho kā makkhikāti . abhijjhā kho bhikkhu kaṭuviyaṃ byāpādo āmagandho pāpakā akusalā vitakkā makkhikā taṃ vata bhikkhu kaṭuviyakataṃ attānaṃ āmagandhe avassutaṃ makkhikā nānupatissanti nānvāssavissantīti netaṃ ṭhānaṃ vijjatīti. Aguttaṃ cakkhusotasmiṃ indriyesu asaṃvutaṃ Makkhikānupatissanti saṅkappā rāganissitā. Kaṭuviyakato bhikkhu āmagandhe avassuto ārakā hoti nibbānā vighātasseva bhāgavā. Gāme vā yadi vā raññe aladdhā samamattano care bālo dummedho makkhikāhi purakkhato. Ye ca sīlena sampannā paññāyūpasame ratā upasantā sukhaṃ senti nāsayitvāna makkhikāti.