[189] Micchādiṭṭhikassa bhikkhave purisapuggalassa yañceva kāyakammaṃ yathādiṭṭhisamattaṃ samādinnaṃ yañca vacīkammaṃ yathādiṭṭhisamattaṃ samādinnaṃ yañca manokammaṃ yathādiṭṭhisamattaṃ samādinnaṃ yā ca cetanā yā ca patthanā yo ca paṇidhi ye ca saṅkhārā sabbe te dhammā aniṭṭhāya akantāya amanāpāya ahitāya dukkhāya saṃvattanti taṃ kissa hetu diṭṭhi hi bhikkhave pāpikā . seyyathāpi bhikkhave nimbabījaṃ vā kosātakībījaṃ vā tittakalābubījaṃ vā allāya paṭhaviyā nikkhittaṃ yañceva paṭhavīrasaṃ upādiyati yañca āporasaṃ upādiyati sabbantaṃ tittakattāya kaṭukattāya asātattāya saṃvattati taṃ kissa hetu bījaṃ hi bhikkhave pāpakaṃ evameva kho bhikkhave micchādiṭṭhikassa purisapuggalassa yañceva kāyakammaṃ yathādiṭṭhisamattaṃ samādinnaṃ yañca vacīkammaṃ yathādiṭṭhisamattaṃ Samādinnaṃ yañca manokammaṃ yathādiṭṭhisamattaṃ samādinnaṃ yā ca cetanā yā ca patthanā yo ca paṇidhi ye ca saṅkhārā sabbe te dhammā aniṭṭhāya akantāya amanāpāya ahitāya dukkhāya saṃvattanti taṃ kissa hetu diṭṭhi hi bhikkhave pāpikāti.

[190] Sammādiṭṭhikassa bhikkhave purisapuggalassa yañceva kāyakammaṃ yathādiṭṭhisamattaṃ samādinnaṃ yañca vacīkammaṃ yathādiṭṭhisamattaṃ samādinnaṃ yañca manokammaṃ yathādiṭṭhisamattaṃ samādinnaṃ yā ca cetanā yā ca patthanā yo ca paṇidhi ye ca saṅkhārā sabbe te dhammā iṭṭhāya kantāya manāpāya hitāya sukhāya saṃvattanti taṃ kissa hetu diṭṭhi hi bhikkhave bhaddikā . seyyathāpi bhikkhave ucchubījaṃ vā sālibījaṃ vā maddikābījaṃ vā allāya paṭhaviyā nikkhittaṃ yañceva paṭhavīrasaṃ upādiyati yañca āporasaṃ upādiyati sabbantaṃ madhurattāya sātattāya asecanakattāya saṃvattati taṃ kissa hetu bījaṃ hi bhikkhave bhaddakaṃ evameva kho bhikkhave sammādiṭṭhikassa purisapuggalassa yañceva kāyakammaṃ yathādiṭṭhisamattaṃ samādinnaṃ yañca vacīkammaṃ yathādiṭṭhisamattaṃ samādinnaṃ yañca manokammaṃ yathādiṭṭhisamattaṃ samādinnaṃ yā ca cetanā yā ca patthanā yo ca paṇidhi ye ca saṅkhārā sabbe te dhammā iṭṭhāya kantāya manāpāya hitāya sukhāya saṃvattanti taṃ kissa hetu diṭṭhi hi bhikkhave bhaddikāti. Vaggo dutiyo.