[145] Cattārome bhikkhave pajjotā katame cattāro candappajjoto suriyappajjoto aggippajjoto paññāppajjoto ime kho bhikkhave cattāro pajjotā etadaggaṃ bhikkhave imesaṃ catunnaṃ pajjotānaṃ yadidaṃ paññāppajjototi.

[146] Cattārome bhikkhave kālā katame cattāro kālena dhammassavanaṃ kālena dhammasākacchā kālena samatho kālena vipassanā ime kho bhikkhave cattāro kālāti.

[147] Cattārome bhikkhave kālā sammābhāviyamānā sammā- anuparivattiyamānā anupubbena āsavānaṃ khayaṃ pāpenti katame cattāro kālena dhammassavanaṃ kālena dhammasākacchā kālena samatho kālena Vipassanā ime kho bhikkhave cattāro kālā sammābhāviyamānā sammāanuparivattiyamānā anupubbena āsavānaṃ khayaṃ pāpenti seyyathāpi bhikkhave uparipabbate thullaphusitake deve vassante [1]- udakaṃ yathāninnaṃ pavattamānaṃ pabbatakandarapadarasākhā paripūreti pabbatakandarapadarasākhā paripūrā kusobbhe paripūrenti kusobbhā paripūrā mahāsobbhe paripūrenti mahāsobbhā paripūrā kunnadiyo paripūrenti kunnadiyo paripūrā mahānadiyo paripūrenti mahānadiyo paripūrā samuddasāgaraṃ paripūrenti evameva kho bhikkhave ime cattāro kālā sammābhāviyamānā sammāanuparivattiyamānā anupubbena āsavānaṃ khayaṃ pāpentīti.

[148] Cattārīmāni bhikkhave vacīduccaritāni katamāni cattāri musāvādo pisuṇā vācā pharusā vācā samphappalāpo imāni kho bhikkhave cattāri vacīduccaritānīti.