[158] Tatra kho āyasmā sārīputto bhikkhū āmantesi āvuso bhikkhavoti . āvusoti kho te bhikkhū āyasmato sārīputtassa paccassosuṃ . āyasmā sārīputto etadavoca yo hi koci āvuso bhikkhu vā bhikkhunī vā cattāro dhamme attani samanupassati niṭṭhamettha gantabbaṃ parihāyāmi kusalehi dhammehi parihānametaṃ vuttaṃ bhagavatā katame cattāro rāgavepullataṃ dosavepullataṃ mohavepullataṃ gambhīresu kho panassa ṭhānāṭhānesu paññācakkhuṃ nakkamati yo hi koci āvuso bhikkhu vā bhikkhunī vā ime cattāro dhamme attani samanupassati niṭṭhamettha gantabbaṃ parihāyāmi kusalehi dhammehi parihānametaṃ vuttaṃ bhagavatā yo hi koci āvuso bhikkhu vā bhikkhunī vā cattāro dhamme attani samanupassati niṭṭhamettha gantabbaṃ na parihāyāmi kusalehi dhammehi aparihānametaṃ vuttaṃ bhagavatā katame cattāro rāgatanuttaṃ dosatanuttaṃ mohatanuttaṃ gambhīresu kho panassa ṭhānāṭhānesu paññācakkhuṃ kamati yo hi koci āvuso bhikkhu vā bhikkhunī vā ime cattāro dhamme attani samanupassati niṭṭhamettha gantabbaṃ na parihāyāmi kusalehi dhammehi aparihānametaṃ vuttaṃ bhagavatāti.
[159] Ekaṃ samayaṃ āyasmā ānando kosambiyaṃ viharati Ghositārāme . athakho aññatarā bhikkhunī aññataraṃ purisaṃ āmantesi ehi tvaṃ ambho purisa yena ayyo ānando tenupasaṅkama upasaṅkamitvā mama vacanena ayyassa ānandassa pāde sirasā vanda itthannāmā bhante bhikkhunī ābādhikinī dukkhitā bāḷhagilānā sā ayyassa ānandassa pāde sirasā vandatīti evañca vadehi sādhu kira bhante ayyo ānando yena bhikkhunūpassayo yena sā bhikkhunī tenupasaṅkamatu anukampaṃ upādāyāti . evaṃ ayyeti kho so puriso tassā bhikkhuniyā paṭissuṇitvā yenāyasmā ānando tenupasaṅkami upasaṅkamitvā āyasmantaṃ ānandaṃ abhivādetvā ekamantaṃ nisīdi ekamantaṃ nisinno kho so puriso āyasmantaṃ ānandaṃ etadavoca itthannāmā bhante bhikkhunī ābādhikinī dukkhitā bāḷhagilānā sā ayyassa ānandassa pāde sirasā vandati evañca vadeti sādhu kira bhante ayyo ānando yena bhikkhunūpassayo yena sā bhikkhunī tenupasaṅkamatu anukampaṃ upādāyāti. Adhivāsesi kho āyasmā ānando tuṇhībhāvena. {159.1} Athakho āyasmā ānando pubbaṇhasamayaṃ nivāsetvā pattacīvaramādāya yena bhikkhunūpassayo tenupasaṅkami . addasā kho sā bhikkhunī āyasmantaṃ ānandaṃ dūratova āgacchantaṃ disvā sasīsaṃ pārupitvā mañcake nipajji . athakho āyasmā ānando yena sā bhikkhunī tenupasaṅkami upasaṅkamitvā paññatte āsane nisīdi . Nisajja kho āyasmā ānando taṃ bhikkhuniṃ etadavoca āhārasambhūto ayaṃ bhagini kāyo āhāraṃ nissāya āhāro pahātabbo taṇhāsambhūto ayaṃ bhagini kāyo taṇhaṃ nissāya taṇhā pahātabbā mānasambhūto ayaṃ bhagini kāyo mānaṃ nissāya māno pahātabbo methunasambhūto ayaṃ bhagini kāyo methuno pahātabbo methuno setughāto vutto bhagavatā. {159.2} Āhārasambhūto ayaṃ bhagini kāyo āhāraṃ nissāya āhāro pahātabboti iti kho panetaṃ vuttaṃ kiñcetaṃ paṭicca vuttaṃ idha bhagini bhikkhu paṭisaṅkhā yoniso āhāraṃ āhāreti neva davāya na madāya na maṇḍanāya na vibhūsanāya yāvadeva imassa kāyassa ṭhitiyā yāpanāya vihiṃsūparatiyā brahmacariyānuggahāya iti purāṇañca vedanaṃ paṭihaṅkhāmi navañca vedanaṃ na uppādessāmi yātrā ca me bhavissati anavajjatā ca phāsuvihāro cāti so aparena samayena āhāraṃ nissāya āhāraṃ pajahati āhārasambhūto ayaṃ bhagini kāyo āhāraṃ nissāya āhāro pahātabboti iti yantaṃ vuttaṃ idametaṃ paṭicca vuttaṃ. {159.3} Taṇhāsambhūto ayaṃ bhagini kāyo taṇhaṃ nissāya taṇhā pahātabbāti iti kho panetaṃ vuttaṃ kiñcetaṃ paṭicca vuttaṃ idha bhagini bhikkhu suṇāti itthannāmo kira bhikkhu āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharatīti tassa evaṃ hoti kadāssu nāma Ahaṃpi āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharissāmīti so aparena samayena taṇhaṃ nissāya taṇhaṃ pajahati taṇhāsambhūto ayaṃ bhagini kāyo taṇhaṃ nissāya taṇhā pahātabbāti iti yantaṃ vuttaṃ idametaṃ paṭicca vuttaṃ. {159.4} Mānasambhūto ayaṃ bhagini kāyo mānaṃ nissāya māno pahātabboti iti kho panetaṃ vuttaṃ kiñcetaṃ paṭicca vuttaṃ idha bhagini bhikkhu suṇāti itthannāmo kira bhikkhu āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharatīti tassa evaṃ hoti so hi nāma āyasmā āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharissati kimaṅgaṃ panāhanti so aparena samayena mānaṃ nissāya mānaṃ pajahati mānasambhūto ayaṃ bhagini kāyo mānaṃ nissāya māno pahātabboti iti yantaṃ vuttaṃ idametaṃ paṭicca vuttaṃ. {159.5} Methunasambhūto ayaṃ bhagini kāyo methuno pahātabbo methuno setughāto vutto bhagavatāti . athakho sā bhikkhunī mañcakā vuṭṭhahitvā ekaṃsaṃ uttarāsaṅgaṃ karitvā āyasmato ānandassa pādesu sirasā nipatitvā āyasmantaṃ ānandaṃ etadavoca accayo maṃ bhante accagamā yathābālaṃ yathāmūḷhaṃ yathāakusalaṃ yāhaṃ evamakāsiṃ tassā me bhante ayyo ānando accayaṃ accayato paṭiggaṇhātu Āyatiṃ saṃvarāyāti . taggha taṃ bhagini accayo accagamā yathābālaṃ yathāmūḷhaṃ yathāakusalaṃ yā tvaṃ evamakāsi yato ca kho tvaṃ bhagini accayaṃ accayato disvā yathādhammaṃ paṭikarosi tante mayaṃ paṭiggaṇhāma vuḍḍhihesā bhagini ariyassa vinaye yā accayaṃ accayato disvā yathādhammaṃ paṭikaroti āyatiṃ saṃvaraṃ āpajjatīti.