[188] Ekaṃ samayaṃ bhagavā rājagahe viharati gijjhakūṭe pabbate. Athakho upako maṇḍikāputto yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi ekamantaṃ nisinno kho upako maṇḍikāputto bhagavantaṃ etadavoca ahaṃ hi bhante evaṃvādī evaṃdiṭṭhī yokoci parūpārambhaṃ vatteti parūpārambhaṃ vattento sabbo so na uppādeti anuppādento gārayho hoti upavajjoti. {188.1} Parūpārambhaṃ ce upaka vatteti parūpārambhaṃ vattento na uppādeti anuppādento gārayho hoti upavajjo tvaṃ kho upaka parūpārambhaṃ vattesi parūpārambhaṃ vattento na uppādesi anuppādento gārayhosi upavajjoti . seyyathāpi Bhante ummujjamānakaṃyeva mahatā pāsena bandheyya evameva kho ahaṃ bhante ummujjamānakoyeva bhagavatā mahatā vādapāsena baddhoti. {188.2} Idaṃ akusalanti kho upaka mayā paññattaṃ tattha aparimāṇā padā aparimāṇā byañjanā aparimāṇā tathāgatassa dhammadesanā itipīdaṃ akusalanti taṃ kho panidaṃ akusalaṃ pahātabbanti kho upaka mayā paññattaṃ tattha aparimāṇā padā aparimāṇā byañjanā aparimāṇā tathāgatassa dhammadesanā itipīdaṃ akusalaṃ pahātabbanti idaṃ kusalanti kho upaka mayā paññattaṃ tattha aparimāṇā padā aparimāṇā byañjanā aparimāṇā tathāgatassa dhammadesanā itipīdaṃ kusalanti taṃ kho panidaṃ kusalaṃ bhāvetabbanti kho upaka mayā paññattaṃ tattha aparimāṇā padā aparimāṇā byañjanā aparimāṇā tathāgatassa dhammadesanā itipīdaṃ kusalaṃ bhāvetabbanti. {188.3} Athakho upako maṇḍikāputto bhagavato bhāsitaṃ abhinanditvā anumoditvā uṭṭhāyāsanā bhagavantaṃ abhivādetvā padakkhiṇaṃ katvā yena rājā māgadho ajātasattu vedehiputto tenupasaṅkami upasaṅkamitvā yāvatako ahosi bhagavatā saddhiṃ kathāsallāpo taṃ sabbaṃ rañño māgadhassa ajātasattussa vedehiputtassa ārocesi . evaṃ vutte rājā māgadho ajātasattu vedehiputto kupito anattamano upakaṃ maṇḍikāputtaṃ etadavoca yāvadhaṃsīvatāyaṃ loṇakārakadārako yāvamukharo yāvapagabbho Yatra hi nāma taṃ bhagavantaṃ arahantaṃ sammāsambuddhaṃ apasādetabbaṃ maññissati apehi tvaṃ upaka vinassa mā taṃ addasanti.