[192] Cattārīmāni bhikkhave ṭhānāni catūhi ṭhānehi veditabbāni katamāni cattāri saṃvāsena bhikkhave sīlaṃ veditabbaṃ tañca kho dīghena addhunā na ittaraṃ manasikarotā no amanasikārā paññavatā no duppaññena saṃvohārena bhikkhave soceyyaṃ veditabbaṃ tañca kho dīghena addhunā na ittaraṃ manasikarotā no amanasikārā paññavatā no duppaññena āpadāsu bhikkhave thāmo veditabbo so ca kho dīghena addhunā na ittaraṃ manasikarotā no amanasikārā paññavatā no duppaññena sākacchāya bhikkhave paññā veditabbā sā ca kho dīghena addhunā na ittaraṃ manasikarotā no amanasikārā paññavatā no duppaññena. {192.1} Saṃvāsena bhikkhave sīlaṃ veditabbaṃ tañca kho dīghena addhunā na ittaraṃ manasikarotā no amanasikārā paññavatā no duppaññenāti iti kho panetaṃ vuttaṃ kiñcetaṃ paṭicca vuttaṃ idha bhikkhave puggalo puggalena saddhiṃ saṃvasamāno evaṃ jānāti dīgharattaṃ kho ayamāyasmā khaṇḍakārī chiddakārī sabalakārī kammāsakārī na satatakārī na satatavuttī sīlesu dussīlo ayamāyasmā Nāyamāyasmā sīlavāti idha pana bhikkhave puggalo puggalena saddhiṃ saṃvasamāno evaṃ jānāti dīgharattaṃ kho ayamāyasmā akhaṇḍakārī acchiddakārī asabalakārī akammāsakārī satatakārī satatavuttī sīlesu sīlavā ayamāyasmā nāyamāyasmā dussīloti saṃvāsena bhikkhave sīlaṃ veditabbaṃ tañca kho dīghena addhunā na ittaraṃ manasikarotā no amanasikārā paññavatā no duppaññenāti iti yantaṃ vuttaṃ idametaṃ paṭicca vuttaṃ. {192.2} Saṃvohārena bhikkhave soceyyaṃ veditabbaṃ tañca kho dīghena addhunā na ittaraṃ manasikarotā no amanasikārā paññavatā no duppaññenāti iti kho panetaṃ vuttaṃ kiñcetaṃ paṭicca vuttaṃ idha bhikkhave puggalo puggalena saddhiṃ saṃvoharamāno evaṃ jānāti aññathā kho ayamāyasmā ekena eko voharati aññathā dvīhi aññathā tīhi aññathā sambahulehi vokkamati ayamāyasmā purimavohārā pacchimavohāraṃ aparisuddhavohāro ayamāyasmā nāyamāyasmā parisuddhavohāroti {192.3} idha pana bhikkhave puggalo puggalena saddhiṃ saṃvoharamāno evaṃ jānāti yathā kho ayamāyasmā ekena eko voharati tathā dvīhi tathā tīhi tathā sambahulehi nāyamāyasmā vokkamati purimavohārā pacchimavohāraṃ parisuddhavohāro ayamāyasmā nāyamāyasmā aparisuddhavohāroti saṃvohārena bhikkhave soceyyaṃ veditabbaṃ tañca kho dīghena addhunā na ittaraṃ manasikarotā no amanasikārā paññavatā no duppaññenāti iti yantaṃ Vuttaṃ idametaṃ paṭicca vuttaṃ. {192.4} Āpadāsu bhikkhave thāmo veditabbo so ca kho dīghena addhunā na ittaraṃ manasikarotā no amanasikārā paññavatā no duppaññenāti iti kho panetaṃ vuttaṃ kiñcetaṃ paṭicca vuttaṃ idha bhikkhave ekacco ñātibyasanena vā phuṭṭho samāno bhogabyasanena vā phuṭṭho samāno rogabyasanena vā phuṭṭho samāno na iti paṭisañcikkhati tathābhūto kho ayaṃ lokasannivāso tathābhūto attabhāvapaṭilābho yathābhūte lokasannivāse yathābhūte attabhāvapaṭilābhe aṭṭha lokadhammā lokaṃ anuparivattanti loko ca aṭṭha lokadhamme anuparivattati lābho ca alābho ca yaso ca ayaso ca nindā ca pasaṃsā ca sukhañca dukkhañcāti so ñātibyasanena vā phuṭṭho samāno bhogabyasanena vā phuṭṭho samāno rogabyasanena vā phuṭṭho samāno socati kilamati paridevati urattāḷī kandati sammohaṃ āpajjati {192.5} idha pana bhikkhave ekacco ñātibyasanena vā phuṭṭho samāno bhogabyasanena vā phuṭṭho samāno rogabyasanena vā phuṭṭho samāno iti paṭisañcikkhati tathābhūto kho ayaṃ lokasannivāso tathābhūto attabhāvapaṭilābho yathābhūte lokasannivāse yathābhūte attabhāvapaṭilābhe aṭṭha lokadhammā lokaṃ anuparivattanti loko ca aṭṭha lokadhamme anuparivattati lābho ca alābho ca yaso ca ayaso ca nindā ca pasaṃsā ca sukhañca dukkhañcāti so ñātibyasanena vā phuṭṭho samāno bhogabyasanena Vā phuṭṭho samāno rogabyasanena vā phuṭṭho samāno na socati na kilamati na paridevati na urattāḷī kandati na sammohaṃ āpajjati āpadāsu bhikkhave thāmo veditabbo so ca kho dīghena addhunā na ittaraṃ manasikarotā no amanasikārā paññavatā no duppaññenāti iti yantaṃ vuttaṃ idametaṃ paṭicca vuttaṃ. {192.6} Sākacchāya bhikkhave paññā veditabbā sā ca kho dīghena addhunā na ittaraṃ manasikarotā no amanasikārā paññavatā no duppaññenāti iti kho panetaṃ vuttaṃ kiñcetaṃ paṭicca vuttaṃ idha bhikkhave puggalo puggalena saddhiṃ sākacchāyamāno evaṃ jānāti yathā kho imassa āyasmato ummaṅgo yathā ca abhinīhāro yathā ca pañhasamudācāro duppañño ayamāyasmā nāyamāyasmā paññavā taṃ kissa hetu tathā hi ayamāyasmā na ceva gambhīraṃ atthapadaṃ udāharati santaṃ paṇītaṃ atakkāvacaraṃ nipuṇaṃ paṇḍitavedanīyaṃ yañca ayamāyasmā dhammaṃ bhāsati tassa ca na paṭibalo saṅkhittena vā vitthārena vā atthaṃ ācikkhituṃ desetuṃ paññāpetuṃ paṭṭhapetuṃ vivarituṃ vibhajituṃ uttānīkātuṃ duppañño ayamāyasmā nāyamāyasmā paññavāti {192.7} seyyathāpi bhikkhave cakkhumā puriso udakarahadassa tīre ṭhito passeyya parittaṃ macchaṃ ummujjamānaṃ tassa evamassa yathā kho imassa macchassa ummaṅgo yathā ca ūmighāto yathā ca vegāyitattaṃ paritto Ayaṃ maccho nāyaṃ maccho mahantoti evameva kho bhikkhave puggalo puggalena saddhiṃ sākacchāyamāno evaṃ jānāti yathā kho imassa āyasmato ummaṅgo .pe. duppañño ayamāyasmā nāyamāyasmā paññavāti {192.8} idha pana bhikkhave puggalo puggalena saddhiṃ sākacchāyamāno evaṃ jānāti yathā kho imassa āyasmato ummaṅgo yathā ca abhinīhāro yathā ca pañhasamudācāro paññavā ayamāyasmā nāyamāyasmā duppañño taṃ kissa hetu tathā hi ayamāyasmā gambhīrañceva atthapadaṃ udāharati santaṃ paṇītaṃ atakkāvacaraṃ nipuṇaṃ paṇḍitavedanīyaṃ yañca ayamāyasmā dhammaṃ bhāsati tassa ca paṭibalo saṅkhittena vā vitthārena vā atthaṃ ācikkhituṃ desetuṃ paññāpetuṃ paṭṭhapetuṃ vivarituṃ vibhajituṃ uttānīkātuṃ paññavā ayamāyasmā nāyamāyasmā duppaññoti {192.9} seyyathāpi bhikkhave cakkhumā puriso udakarahadassa tīre ṭhito passeyya mahantaṃ macchaṃ ummujjamānaṃ tassa evamassa yathā kho imassa macchassa ummaṅgo yathā ca ūmighāto yathā ca vegāyitattaṃ mahanto ayaṃ maccho nāya maccho parittoti evameva kho bhikkhave puggalo puggalena saddhiṃ sākacchāyamāno evaṃ jānāti yathā kho imassa āyasmato ummaṅgo .pe. paññavā ayamāyasmā nāyamāyasmā duppaññoti sākacchāya bhikkhave paññā veditabbā sā ca kho dīghena addhunā na ittaraṃ manasikarotā no amanasikārā paññavatā no duppaññenāti Iti yantaṃ vuttaṃ idametaṃ paṭicca vuttaṃ . imāni kho bhikkhave cattāri ṭhānāni imehi catūhi ṭhānehi veditabbānīti.