[232] Cattārīmāni bhikkhave kammāni mayā sayaṃ abhiññā sacchikatvā paveditāni katamāni cattāri atthi bhikkhave kammaṃ kaṇhaṃ kaṇhavipākaṃ atthi bhikkhave kammaṃ sukkaṃ sukkavipākaṃ atthi bhikkhave Kammaṃ kaṇhaṃ sukkaṃ kaṇhasukkavipākaṃ atthi bhikkhave kammaṃ akaṇhaṃ asukkaṃ akaṇhaasukkavipākaṃ kammakkhayāya saṃvattati imāni kho bhikkhave cattāri kammāni mayā sayaṃ abhiññā sacchikatvā paveditānīti.

[233] Cattārīmāni bhikkhave kammāni mayā sayaṃ abhiññā sacchikatvā paveditāni katamāni cattāri atthi bhikkhave kammaṃ kaṇhaṃ kaṇhavipākaṃ atthi bhikkhave kammaṃ sukkaṃ sukkavipākaṃ atthi bhikkhave kammaṃ kaṇhaṃ sukkaṃ kaṇhasukkavipākaṃ atthi bhikkhave kammaṃ akaṇhaṃ asukkaṃ akaṇhaasukkavipākaṃ kammakkhayāya saṃvattati. {233.1} Katamañca bhikkhave kammaṃ kaṇhaṃ kaṇhavipākaṃ idha bhikkhave ekacco sabyāpajjhaṃ kāyasaṅkhāraṃ abhisaṅkharoti sabyāpajjhaṃ vacīsaṅkhāraṃ abhisaṅkharoti sabyāpajjhaṃ manosaṅkhāraṃ abhisaṅkharoti so sabyāpajjhaṃ kāyasaṅkhāraṃ abhisaṅkharitvā sabyāpajjhaṃ vacīsaṅkhāraṃ abhisaṅkharitvā sabyāpajjhaṃ manosaṅkhāraṃ abhisaṅkharitvā sabyāpajjhaṃ lokaṃ upapajjati tamenaṃ sabyāpajjhaṃ lokaṃ upapannaṃ samānaṃ sabyāpajjhā phassā phusanti so sabyāpajjhehi phassehi phuṭṭho samāno sabyāpajjhaṃ vedanaṃ vediyati ekantadukkhaṃ seyyathāpi sattā nerayikā idaṃ vuccati bhikkhave kammaṃ kaṇhaṃ kaṇhavipākaṃ. {233.2} Katamañca bhikkhave kammaṃ sukkaṃ sukkavipākaṃ idha bhikkhave ekacco abyāpajjhaṃ kāyasaṅkhāraṃ abhisaṅkharoti abyāpajjhaṃ vacīsaṅkhāraṃ abhisaṅkharoti abyāpajjhaṃ manosaṅkhāraṃ abhisaṅkharoti so abyāpajjhaṃ kāyasaṅkhāraṃ abhisaṅkharitvā abyāpajjhaṃ vacīsaṅkhāraṃ abhisaṅkharitvā abyāpajjhaṃ manosaṅkhāraṃ abhisaṅkharitvā Abyāpajjhaṃ lokaṃ upapajjati tamenaṃ abyāpajjhaṃ lokaṃ upapannaṃ samānaṃ abyāpajjhā phassā phusanti so abyāpajjhehi phassehi phuṭṭho samāno abyāpajjhaṃ vedanaṃ vediyati ekantasukhaṃ seyyathāpi devā subhakiṇhā idaṃ vuccati bhikkhave kammaṃ sukkaṃ sukkavipākaṃ. {233.3} Katamañca bhikkhave kammaṃ kaṇhaṃ sukkaṃ kaṇhasukkavipākaṃ idha bhikkhave ekacco sabyāpajjhaṃpi abyāpajjhaṃpi kāyasaṅkhāraṃ abhisaṅkharoti sabyāpajjhaṃpi abyāpajjhaṃpi vacīsaṅkhāraṃ abhisaṅkharoti sabyāpajjhaṃpi abyāpajjhaṃpi manosaṅkhāraṃ abhisaṅkharoti so sabyāpajjhaṃpi abyāpajjhaṃpi kāyasaṅkhāraṃ abhisaṅkharitvā sabyāpajjhaṃpi abyāpajjhaṃpi vacīsaṅkhāraṃ abhisaṅkharitvā sabyāpajjhaṃpi abyāpajjhaṃpi manosaṅkhāraṃ abhisaṅkharitvā sabyāpajjhaṃpi abyāpajjhaṃpi lokaṃ upapajjati tamenaṃ sabyāpajjhaṃpi abyāpajjhaṃpi lokaṃ upapannaṃ samānaṃ sabyāpajjhāpi abyāpajjhāpi phassā phusanti so sabyāpajjhehipi abyāpajjhehipi phassehi phuṭṭho samāno sabyāpajjhaṃpi abyāpajjhaṃpi vedanaṃ vediyati vokiṇṇasukhadukkhaṃ seyyathāpi manussā ekacce ca devā ekacce ca vinipātikā idaṃ vuccati bhikkhave kammaṃ kaṇhaṃ sukkaṃ kaṇhasukkavipākaṃ. {233.4} Katamañca bhikkhave kammaṃ akaṇhaṃ asukkaṃ akaṇhaasukkavipākaṃ kammakkhayāya saṃvattati tatra bhikkhave yampīdaṃ kammaṃ kaṇhaṃ kaṇhavipākaṃ tassa pahānāya yā cetanā yampīdaṃ kammaṃ sukkaṃ sukkavipākaṃ tassa pahānāya yā cetanā yampīdaṃ kammaṃ kaṇhaṃ sukkaṃ kaṇhasukkavipākaṃ tassa pahānāya yā cetanā idaṃ vuccati Bhikkhave kammaṃ akaṇhaṃ asukkaṃ akaṇhaasukkavipākaṃ kammakkhayāya saṃvattati . imāni kho bhikkhave cattāri kammāni mayā sayaṃ abhiññā sacchikatvā paveditānīti.