[246] Catasso imā bhikkhave seyyā katamā catasso petaseyyā kāmabhogiseyyā sīhaseyyā tathāgataseyyā . katamā ca bhikkhave petaseyyā yebhuyyena bhikkhave petā uttānā senti ayaṃ vuccati bhikkhave petaseyyā . katamā ca bhikkhave kāmabhogiseyyā yebhuyyena bhikkhave kāmabhogī vāmena passena senti ayaṃ vuccati bhikkhave kāmabhogiseyyā. {246.1} Katamā ca bhikkhave sīhaseyyā sīho bhikkhave migarājā dakkhiṇena passena seyyaṃ kappeti pādena pādaṃ accādhāya antarasaṭṭhimhi naṅguṭṭhaṃ anupakkhipitvā so paṭibujjhitvā purimaṃ kāyaṃ abbhunnāmetvā pacchimaṃ kāyaṃ anuviloketi sace bhikkhave sīho migarājā kiñci passati kāyassa vikkhittaṃ vā visaṭaṃ vā tena bhikkhave sīho migarājā anattamano hoti sace pana bhikkhave sīho migarājā na kiñci passati kāyassa vikkhittaṃ vā visaṭaṃ vā Tena bhikkhave sīho migarājā attamano hoti ayaṃ vuccati bhikkhave sīhaseyyā . katamā ca bhikkhave tathāgataseyyā idha bhikkhave bhikkhu vivicce kāmehi .pe. catutthaṃ jhānaṃ upasampajja viharati ayaṃ vuccati bhikkhave tathāgataseyyā. Imā kho bhikkhave catasso seyyāti.

[247] Cattārome bhikkhave thūpārahā katame cattāro tathāgato arahaṃ sammāsambuddho thūpāraho paccekabuddho thūpāraho tathāgatasāvako thūpāraho rājā cakkavattī thūpāraho ime kho bhikkhave cattāro thūpārahāti.

[248] Cattārome bhikkhave dhammā paññāvuḍḍhiyā saṃvattanti katame cattāro sappurisasaṃsevo saddhammassavanaṃ yonisomanasikāro dhammānudhammapaṭipatti ime kho bhikkhave cattāro dhammā paññāvuḍḍhiyā saṃvattantīti.

[249] Cattārome bhikkhave dhammā manussabhūtassa bahukārā honti katame cattāro sappurisasaṃsevo saddhammassavanaṃ yonisomanasikāro dhammānudhammapaṭipatti ime kho bhikkhave cattāro dhammā manussabhūtassa bahukārā hontīti.