[121] Ekaṃ samayaṃ bhagavā vesāliyaṃ viharati mahāvane kūṭāgārasālāyaṃ. Athakho bhagavā sāyaṇhasamayaṃ paṭisallānā vuṭṭhito yena gilānasālā tenupasaṅkami addasā kho bhagavā aññataraṃ bhikkhuṃ dubbalaṃ gilānakaṃ disvā paññatte āsane nisīdi nisajja kho bhagavā bhikkhū āmantesi yaṅkañci bhikkhave dubbalaṃ gilānakaṃ pañca dhammā na vijahanti tassetaṃ pāṭikaṅkhaṃ nacirasseva āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharissati katame pañca idha bhikkhave Bhikkhu asubhānupassī kāye viharati āhāre paṭikkūlasaññī sabbaloke anabhiratasaññī sabbasaṅkhāresu aniccānupassī maraṇasaññā kho panassa ajjhattaṃ supaṭṭhitā hoti yaṅkañci bhikkhave dubbalaṃ gilānakaṃ ime pañca dhammā na vijahanti tassetaṃ pāṭikaṅkhaṃ nacirasseva āsavānaṃ khayā .pe. sacchikatvā upasampajja viharissatīti.