[167] Tatra kho āyasmā sārīputto bhikkhū āmantesi codakena āvuso bhikkhunā paraṃ codetukāmena pañca dhamme ajjhattaṃ upaṭṭhāpetvā paro codetabbo katame pañca kālena vakkhāmi no akālena bhūtena vakkhāmi no abhūtena saṇhena vakkhāmi no pharusena atthasañhitena vakkhāmi no anatthasañhitena mettacitto vakkhāmi no dosantaro codakena āvuso bhikkhunā paraṃ codetukāmena ime pañca dhamme ajjhattaṃ upaṭṭhāpetvā paro codetabbo. Bhikkhu abhūtena codetabbaṃ maññeyyāti. {167.5} Idha panāhaṃ āvuso ekaccaṃ puggalaṃ passāmi kālena codiyamānaṃ no akālena kupitaṃ bhūtena codiyamānaṃ no abhūtena kupitaṃ saṇhena codiyamānaṃ no pharusena kupitaṃ atthasañhitena codiyamānaṃ no anatthasañhitena kupitaṃ mettacittena codiyamānaṃ no dosantarena kupitaṃ. {167.6} Dhammacuditassa āvuso bhikkhuno pañcahākārehi vippaṭisāro upadahitabbo kālenāyasmā cudito no akālena alante vippaṭisārāya bhūtenāyasmā cudito no abhūtena alante vippaṭisārāya saṇhenāyasmā cudito no pharusena alante vippaṭisārāya atthasañhitenāyasmā cudito no anatthasañhitena alante vippaṭisārāya mettacittenāyasmā cudito no dosantarena alante vippaṭisārāyāti . dhammacuditassa āvuso bhikkhuno imehi pañcahākārehi vippaṭisāro upadahitabbo. {167.7} Dhammacodakassa āvuso bhikkhuno pañcahākārehi avippaṭisāro upadahitabbo kālena te āvuso cudito no akālena alante avippaṭisārāya bhūtena te āvuso cudito no abhūtena alante avippaṭisārāya saṇhena te āvuso cudito no pharusena alante avippaṭisārāya atthasañhitena te āvuso cudito no anatthasañhitena alante avippaṭisārāya mettacittena te āvuso cudito no dosantarena alante avippaṭisārāyāti . dhammacodakassa āvuso bhikkhuno imehi pañcahākārehi avippaṭisāro upadahitabbo taṃ kissa hetu yathā Aññopi bhikkhu bhūtena coditabbaṃ maññeyyāti. {167.8} Cuditena āvuso puggalena dvīsu dhammesu patiṭṭhātabbaṃ sacce ca akuppe ca. Pañcahi [1]- āvuso pare codeyyuṃ kālena vā akālena vā bhūtena vā abhūtena vā saṇhena vā pharusena vā atthasañhitena vā anatthasañhitena vā mettacittā vā dosantarā vā . Ahaṃpi dvīsuyeva dhammesu patiṭṭhaheyyaṃ sacce ca akuppe ca. Sace jāneyyaṃ attheso mayi dhammoti atthīti naṃ vadeyyaṃ saṃvijjate eso mayi dhammoti sace jāneyyaṃ nattheso mayi dhammoti natthīti naṃ vadeyyaṃ neso dhammo mayi saṃvijjatīti [3]-. Evaṃpi kho te sārīputta vuccamānā atha ca panidhekacce moghapurisā na padakkhiṇaṃ gaṇhantīti . ye te bhante puggalā assaddhā jīvikatthā na saddhā agārasmā anagāriyaṃ pabbajitā saṭhā māyāvino keṭubhino uddhatā unnaḷā capalā mukharā vikiṇṇavācā indriyesu aguttadvārā bhojane amattaññuno jāgariyaṃ ananuyuttā sāmaññe anapekkhavanto sikkhāya na tibbagāravā bāhullikā sāthalikā okkamane pubbaṅgamā paviveke nikkhittadhurā kusītā hīnaviriyā muṭṭhassatino asampajānā asamāhitā vibbhantacittā duppaññā eḷamūgā te mayā evaṃ vuccamānā na pakkhiṇaṃ gaṇhanti ye pana te bhante kulaputtā Saddhā agārasmā anagāriyaṃ pabbajitā asaṭhā amāyāvino akeṭubhino anuddhatā anunnaḷā acapalā amukharā avikiṇṇavācā indriyesu guttadvārā bhojane mattaññuno jāgariyaṃ anuyuttā sāmaññe apekkhavanto sikkhāya tibbagāravā na bāhullikā na sāthalikā okkamane nikkhittadhurā paviveke pubbaṅgamā āraddhaviriyā pahitattā upaṭṭhitassatino sampajānā samāhitā ekaggacittā paññavanto aneḷamūgā te mayā evaṃ vuccamānā padakkhiṇaṃ gaṇhantīti. {167.9} Ye te sārīputta puggalā assaddhā jīvikatthā na saddhā agārasmā anagāriyaṃ pabbajitā saṭhā māyāvino keṭubhino uddhatā unnaḷā capalā mukharā vikiṇṇavācā indriyesu aguttadvārā bhojane amattaññuno jāgariyaṃ ananuyuttā sāmaññe anapekkhavanto sikkhāya na tibbagāravā bāhullikā sāthalikā okkamane pubbaṅgamā paviveke nikkhittadhurā kusītā hīnaviriyā muṭṭhassatino asampajānā asamāhitā vibbhantacittā duppaññā eḷamūgā tiṭṭhatu [1]- {167.10} ye pana te sārīputta kulaputtā saddhā agārasmā anāgāriyaṃ pabbajitā asaṭhā amāyāvino akeṭubhino anuddhatā anunnaḷā acapalā amukharā avikiṇṇavācā indriyesu guttadvārā bhojane mattaññuno jāgariyaṃ anuyuttā sāmaññe apekkhavanto sikkhāya tibbagāravā na bāhullikā na sāthalikā okkamane nikkhittadhurā paviveke pubbaṅgamā āraddhaviriyā pahitattā upaṭṭhitassatino sampajānā samāhitā ekaggacittā paññavanto aneḷamūgā te tvaṃ sārīputta vadeyyāsi ovada Sārīputta sabrahmacārī anusāsa sārīputta sabrahmacārī asaddhammā vuṭṭhāpetvā saddhamme patiṭṭhāpessāmi sabrahmacārīti evaṃ hi te sārīputta sikkhitabbanti.