[366] 95 Chayimāni bhikkhave abhabbaṭṭhānāni katamāni cha abhabbo diṭṭhisampanno puggalo sayaṃkataṃ sukhadukkhaṃ paccāgantuṃ abhabbo diṭṭhisampanno puggalo parakataṃ sukhadukkhaṃ paccāgantuṃ abhabbo diṭṭhisampanno puggalo sayaṃkatañca parakatañca sukhadukkhaṃ paccāgantuṃ abhabbo diṭṭhisampanno puggalo asayaṃkāraṃ adhiccasamuppannaṃ sukhadukkhaṃ paccāgantuṃ abhabbo diṭṭhisampanno puggalo aparakāraṃ adhiccasamuppannaṃ sukhadukkhaṃ paccāgantuṃ abhabbo diṭṭhisampanno puggalo asayaṃkārañca aparakārañca adhiccasamuppannaṃ sukhadukkhaṃ paccāgantuṃ taṃ kissa hetu tathā hissa bhikkhave diṭṭhisampannassa puggalassa hetu ca sudiṭṭho hetusamuppannā ca dhammā imāni kho bhikkhave cha abhabbaṭṭhānānīti. Sītivaggo catuttho. Tassuddānaṃ sīti bhabbo āvaraṇatā sussūsā pavuccati pahātabbaṃ pahīnā me uppādetabbaṃ satthari kañci saṅkhāraṃ mātari sayaṃkatena vaggoti .