[138] Pañcahi bhikkhave aṅgehi samannāgato rañño nāgo bhattādako ca hoti okāsapharaṇo ca laṇḍusādhano ca salākaggāhī ca rañño nāgotveva saṅkhaṃ gacchati katamehi pañcahi idha bhikkhave rañño nāgo akkhamo hoti rūpānaṃ akkhamo saddānaṃ akkhamo gandhānaṃ akkhamo rasānaṃ akkhamo phoṭṭhabbānaṃ imehi kho bhikkhave pañcahi aṅgehi samannāgato rañño nāgo bhattādako ca hoti okāsapharaṇo ca laṇḍusādhano ca salākaggāhī ca rañño nāgotveva saṅkhaṃ gacchati evameva kho bhikkhave pañcahi dhammehi samannāgato bhikkhu bhattādako ca hoti okāsapharaṇo ca pīṭhamaddano ca salākaggāhī ca bhikkhutveva saṅkhaṃ gacchati katamehi pañcahi idha bhikkhave bhikkhu akkhamo hoti rūpānaṃ akkhamo saddānaṃ akkhamo gandhānaṃ akkhamo rasānaṃ akkhamo phoṭṭhabbānaṃ imehi kho bhikkhave pañcahi dhammehi samannāgato Bhikkhu bhattādako ca hoti okāsapharaṇo ca pīṭhamaddano ca salākaggāhī ca bhikkhutveva saṅkhaṃ gacchatīti.