[255] Pañcannaṃ bhikkhave macchariyānaṃ pahānāya samucchedāya brahmacariyaṃ vussati katamesaṃ pañcannaṃ āvāsamacchariyassa pahānāya samucchedāya brahmacariyaṃ vussati kulamacchariyassa ... lābhamacchariyassa ... Vaṇṇamacchariyassa ... dhammamacchariyassa pahānāya samucchedāya brahmacariyaṃ vussati imesaṃ kho bhikkhave pañcannaṃ macchariyānaṃ pahānāya samucchedāya brahmacariyaṃ vussatīti.
[256] Pañca bhikkhave dhamme appahāya abhabbo paṭhamaṃ jhānaṃ upasampajja viharituṃ katame pañca āvāsamacchariyaṃ kulamacchariyaṃ lābhamacchariyaṃ vaṇṇamacchariyaṃ dhammamacchariyaṃ ime kho bhikkhave pañca dhamme appahāya abhabbo paṭhamaṃ jhānaṃ upasampajja viharituṃ . pañca bhikkhave dhamme pahāya bhabbo paṭhamaṃ jhānaṃ upasampajja viharituṃ katame pañca āvāsamacchariyaṃ kulamacchariyaṃ lābhamacchariyaṃ vaṇṇamacchariyaṃ dhammamacchariyaṃ ime kho bhikkhave pañca dhamme pahāya bhabbo paṭhamaṃ jhānaṃ upasampajja viharitunti.
[257] Pañca bhikkhave dhamme appahāya abhabbo dutiyaṃ jhānaṃ ... tatiyaṃ jhānaṃ ... catutthaṃ jhānaṃ ... sotāpattiphalaṃ ... Sakadāgāmiphalaṃ ... anāgāmiphalaṃ ... arahattaṃ sacchikātuṃ katame pañca Āvāsamacchariyaṃ kulamacchariyaṃ lābhamacchariyaṃ vaṇṇamacchariyaṃ dhammamacchariyaṃ ime kho bhikkhave pañca dhamme appahāya abhabbo arahattaṃ sacchikātuṃ. Pañca bhikkhave dhamme pahāya bhabbo arahattaṃ sacchikātuṃ katame pañca āvāsamacchariyaṃ kulamacchariyaṃ lābhamacchariyaṃ vaṇṇamacchariyaṃ dhammamacchariyaṃ ime kho bhikkhave pañca dhamme pahāya bhabbo arahattaṃ sacchikātunti.
[258] Pañca bhikkhave dhamme appahāya abhabbo paṭhamaṃ jhānaṃ upasampajja viharituṃ katame pañca āvāsamacchariyaṃ kulamacchariyaṃ lābhamacchariyaṃ vaṇṇamacchariyaṃ akataññutaṃ akataveditaṃ ime kho bhikkhave pañca dhamme appahāya abhabbo paṭhamaṃ jhānaṃ upasampajja viharituṃ . Pañca bhikkhave dhamme pahāya bhabbo paṭhamaṃ jhānaṃ upasampajja viharituṃ katame pañca āvāsamacchariyaṃ kulamacchariyaṃ lābhamacchariyaṃ vaṇṇamacchariyaṃ akataññutaṃ akataveditaṃ ime kho bhikkhave pañca dhamme pahāya bhabbo paṭhamaṃ jhānaṃ upasampajja viharitunti.