[281] 77 Rāgassa bhikkhave abhiññāya nava dhammā bhāvetabbā. Katame nava asubhasaññā maraṇasaññā āhāre paṭikkūlasaññā sabbaloke anabhiratasaññā aniccasaññā anicce dukkhasaññā dukkhe anattasaññā pahānasaññā virāgasaññā . rāgassa bhikkhave abhiññāya ime nava dhammā bhāvetabbāti.

[282] 78 Rāgassa bhikkhave abhiññāya nava dhammā bhāvetabbā. Katame nava paṭhamajjhānaṃ dutiyajjhānaṃ tatiyajjhānaṃ catutthajjhānaṃ ākāsānañcāyatanaṃ viññāṇañcāyatanaṃ ākiñcaññāyatanaṃ nevasaññānāsaññāyatanaṃ saññāvedayitanirodho . rāgassa bhikkhave abhiññāya ime nava dhammā bhāvetabbā.

[283] 79 Rāgassa bhikkhave pariññāya parikkhayāya pahānāya khayāya vayāya virāgāya nirodhāya cāgāya paṭinissaggāya ime nava dhammā bhāvetabbā . dosassa mohassa kodhassa upanāhassa makkhassa palāsassa issāya macchariyassa māyāya sātheyyassa thambhassa sārambhassa mānassa atimānassa madassa pamādassa abhiññāya pariññāya parikkhayāya pahānāya khayāya vayāya virāgāya nirodhāya cāgāya paṭinissaggāya ime nava dhammā bhāvetabbāti . idamavoca bhagavā . attamanā te bhikkhū bhagavato bhāsitaṃ abhinandunti . Navakanipāto samatto. --------------