[127] 37 Aṭṭhimāni bhikkhave sappurisadānāni . katamāni aṭṭha suciṃ deti paṇītaṃ deti kālena deti kappiyaṃ deti viceyya deti abhiṇhaṃ deti dadaṃ cittaṃ pasādeti datvā attamano hoti . imāni kho bhikkhave aṭṭha sappurisadānānīti. Suciṃ paṇītaṃ kālena kappiyaṃ pānabhojanaṃ abhiṇhaṃ dadāti dānāni sukhettesu brahmacārisu neva vippaṭisāriyaṃ cajitvā āmisaṃ bahuṃ evaṃ dinnāni dānāni vaṇṇayanti vipassino evaṃ yajitvā medhāvī saddho muttena cetasā abyāpajjhaṃ sukhaṃ lokaṃ paṇḍito upapajjatīti.