[200] 110 Tassapāpiyyasikākammakatena bhikkhave bhikkhunā aṭṭhasu dhammesu sammāvattitabbaṃ na upasampādetabbaṃ na nissayo dātabbo na sāmaṇero upaṭṭhāpetabbo na bhikkhunovādakasammati sāditabbā sammatenapi bhikkhuniyo na ovaditabbā na kāci saṅghasammati sāditabbā na kismiñci paccekaṭṭhāne niyametabbā na ca tena mūlena vuṭṭhāpetabbaṃ . tassapāpiyyasikākammakatena bhikkhave bhikkhunā imesu aṭṭhasu dhammesu sammāvattitabbanti. Sativaggo samatto. Tassuddānaṃ sati puṇṇiyamūlena corasamaṇena pañcamaṃ yaso pattāpasādena paṭisāraṇīyañca vattatīti . ----------- Sāmaññavaggo bojjhā sirimā padumā sudhammā maṇujā uttarā muttā khemā rucī cundī bimbī sumanā mallikā tissamātā soṇamātā kāṇamātā uttaramātā visākhā migāramātā khujjuttarā upāsikā sāmāvatī upāsikā suppavāsā koḷiyadhītā suppiyā upāsikā nakulamātā gahapatānīti. Sāmaññavaggo pañcamo -------------

[201] 111 Rāgassa bhikkhave abhiññāya aṭṭha dhammā bhāvetabbā. Katame aṭṭha . sammādiṭṭhi sammāsaṅkappo sammāvācā sammākammanto sammāājīvo sammāvāyāmo sammāsati sammāsamādhi . Rāgassa bhikkhave abhiññāya ime aṭṭha dhammā bhāvetabbā.

[202] 112 Rāgassa bhikkhave abhiññāya aṭṭha dhammā bhāvetabbā. Katame aṭṭha . ajjhattaṃ rūpasaññī bahiddhā rūpāni passati parittāni suvaṇṇadubbaṇṇāni tāni abhibhuyya jānāmi passāmīti evaṃsaññī hoti ajjhattaṃ rūpasaññī bahiddhā rūpāni passati appamāṇāni suvaṇṇadubbaṇṇāni tāni abhibhuyya jānāmi passāmīti evaṃsaññī hoti ajjhattaṃ arūpasaññī bahiddhā rūpāni passati parittāni suvaṇṇadubbaṇṇāni tāni abhibhuyya jānāmi passāmīti evaṃsaññī hoti ajjhattaṃ arūpasaññī bahiddhā rūpāni passati appamāṇāni suvaṇṇadubbaṇṇāni tāni abhibhuyya jānāmi passāmīti evaṃsaññī hoti ajjhattaṃ arūpasaññī vā bahiddhā rūpāni passati nīlāni nīlavaṇṇāni nīlanidassanāni nīlanibhāsāni .pe. pītāni pītavaṇṇāni pītanidassanāni pītanibhāsāni .pe. lohitakāni lohitakavaṇṇāni lohitakanidassanāni lohitakanibhāsāni .pe. odātāni odātavaṇṇāni odātanidassanāni odātanibhāsāni tāni abhibhuyya jānāmi passāmīti evaṃsaññī hoti . rāgassa bhikkhave abhiññāya ime aṭṭha dhammā bhāvetabbā.