[62] Hirottappe bhikkhave asati hirottappavipannassa hatūpaniso hoti indriyasaṃvaro indriyasaṃvare asati indriyasaṃvaravipannassa Hatūpanisaṃ hoti sīlaṃ sīle asati sīlavipannassa hatūpaniso hoti sammāsamādhi sammāsamādhismiṃ asati sammāsamādhivipannassa hatūpanisaṃ hoti yathābhūtañāṇadassanaṃ yathābhūtañāṇadassane asati yathābhūtañāṇadassanavipannassa hatūpaniso hoti nibbidāvirāgo nibbidāvirāge asati nibbidāvirāgavipannassa hatūpanisaṃ hoti vimuttiñāṇadassanaṃ seyyathāpi bhikkhave rukkho sākhāpalāsavipanno tassa pappaṭikāpi pāripūriṃ na gacchati tacopi pheggupi sāropi na pāripūriṃ gacchati evameva kho bhikkhave hirottappe asati hirottappavipannassa hatūpaniso hoti indriyasaṃvaro .pe. Vimuttiñāṇadassanaṃ. {62.1} Hirottappe bhikkhave sati hirottappasampannassa upanisasampanno hoti indriyasaṃvaro indriyasaṃvare sati indriyasaṃvarasampannassa upanisasampannaṃ hoti sīlaṃ sīle sati sīlasampannassa upanisasampanno hoti sammāsamādhi sammāsamādhismiṃ sati sammāsamādhisampannassa upanisasampannaṃ hoti yathābhūtañāṇadassanaṃ yathābhūtañāṇadassane sati yathābhūtañāṇadassanasampannassa upanisasampanno hoti nibbidāvirāgo nibbidāvirāge sati nibbidāvirāgasampannassa upanisasampannaṃ hoti vimuttiñāṇadassanaṃ seyyathāpi bhikkhave rukkho sākhāpalāsasampanno tassa pappaṭikāpi pāripūriṃ gacchati tacopi pheggupi sāropi pāripūriṃ gacchati evameva kho bhikkhave hirottappe sati hirottappasampannassa upanisasampanno hoti indriyasaṃvaro .pe. Vimuttiñāṇadassananti.