[106] 16 Aṭṭhahi bhikkhave dhammehi samannāgato bhikkhu dūteyyaṃ gantumarahati . katamehi aṭṭhahi idha bhikkhave bhikkhu sotā ca hoti sāvetā ca uggahetā ca dhāretā ca viññātā ca viññāpetā ca kusalo ca sahitāsahitassa no ca kalahakārako . imehi kho bhikkhave aṭṭhahi dhammehi samannāgato bhikkhu dūteyyaṃ gantumarahati. {106.1} Aṭṭhahi bhikkhave dhammehi samannāgato sārīputto dūteyyaṃ gantumarahati . katamehi aṭṭhahi idha bhikkhave sārīputto sotā ca hoti sāvetā ca uggahetā ca dhāretā ca viññātā ca viññāpetā ca kusalo ca sahitāsahitassa no ca kalahakārako . Imehi kho bhikkhave aṭṭhahi dhammehi samannāgato sārīputto dūteyyaṃ gantumarahatīti. Yo ve na byādhati vatvā parisaṃ uggahavādinaṃ na ca hāpeti vacanaṃ na ca hāpeti sāsanaṃ asandiṭṭhaṃ te bhaṇati pucchito na ca kuppati sa ve tādisako bhikkhu dūteyyaṃ gantumarahatīti.