[65] Ekaṃ samayaṃ āyasmā sārīputto magadhesu viharati nālakagāmake. Athakho sāmaṇḍakāni paribbājako yenāyasmā sārīputto tenupasaṅkami upasaṅkamitvā āyasmatā sārīputtena saddhiṃ sammodi sammodanīyaṃ kathaṃ sārāṇīyaṃ vītisāretvā ekamantaṃ nisīdi ekamantaṃ nisinno kho sāmaṇḍakāni paribbājako āyasmantaṃ sārīputtaṃ etadavoca kinnu kho āvuso sārīputta sukhaṃ kiṃ dukkhanti . abhinibbatti kho Āvuso dukkhā anabhinibbatti sukhā abhinibbattiyā āvuso sati idaṃ dukkhaṃ pāṭikaṅkhaṃ sītaṃ uṇhaṃ jighacchā pipāsā uccāro passāvo aggisamphasso daṇḍasamphasso satthasamphasso ñātīpi naṃ mittāpi saṅgamma samāgamma rosenti abhinibbattiyā āvuso sati idaṃ dukkhaṃ pāṭikaṅkhaṃ . anabhinibbattiyā āvuso sati idaṃ sukhaṃ pāṭikaṅkhaṃ na sītaṃ na uṇhaṃ na jighacchā na pipāsā na uccāro na passāvo na aggisamphasso na daṇḍasamphasso na satthasamphasso ñātīpi naṃ mittāpi saṅgamma samāgamma na rosenti anabhinibbattiyā āvuso sati idaṃ sukhaṃ pāṭikaṅkhanti.