[72] Ekaṃ samayaṃ bhagavā vesāliyaṃ viharati mahāvane kūṭāgārasālāyaṃ sambahulehi abhiññātehi abhiññātehi therehi sāvakehi saddhiṃ āyasmatā ca pālena āyasmatā ca upapālena āyasmatā ca kakkaṭena āyasmatā ca kaḷimbhena āyasmatā ca nikaṭena āyasmatā ca kaṭissahena aññehi ca abhiññātehi abhiññātehi therehi sāvakehi saddhiṃ . Tena kho pana samayena sambahulā abhiññātā abhiññātā licchavī Bhadrehi bhadrehi yānehi paramparāya uccāsaddā mahāsaddā mahāvanaṃ ajjhogāhanti bhagavantaṃ dassanāya. {72.1} Athakho āyasmantānaṃ etadahosi ime kho sambahulā abhiññātā abhiññātā licchavī bhadrehi bhadrehi yānehi paramparāya uccāsaddā mahāsaddā mahāvanaṃ ajjhogāhanti bhagavantaṃ dassanāya saddakaṇṭakā kho pana jhānā vuttā bhagavatā yannūna mayaṃ yena gosiṅgasālavanadāyo tenupasaṅkameyyāma tattha mayaṃ appasaddā appakiṇṇā phāsu vihareyyāmāti athakho te āyasmanto yena gosiṅgasālavanadāyo tenupasaṅkamiṃsu tattha te āyasmanto appasaddā appakiṇṇā phāsu viharanti . athakho bhagavā bhikkhū āmantesi kahaṃ nu kho bhikkhave pālo kahaṃ upapālo kahaṃ kakkaṭo kahaṃ kaḷimbho kahaṃ nikaṭo kahaṃ kaṭissaho kahaṃ nu kho te bhikkhave therā sāvakā gatāti. {72.2} Idha bhante tesaṃ āyasmantānaṃ etadahosi ime kho sambahulā abhiññātā abhiññātā licchavī bhadrehi bhadrehi yānehi paramparāya uccāsaddā mahāsaddā mahāvanaṃ ajjhogāhanti bhagavantaṃ dassanāya saddakaṇṭakā kho jhānā vuttā bhagavatā yannūna mayaṃ yena gosiṅgasālavanadāyo tenupasaṅkameyyāma tattha mayaṃ appasaddā appakiṇṇā phāsu vihareyyāmāti athakho te bhante āyasmanto yena gosiṅgasālavanadāyo tenupasaṅkamiṃsu tattha te āyasmanto appasaddā appakiṇṇā phāsu Viharantīti . sādhu sādhu bhikkhave yathā te mahāsāvakā sammā byākaramānā byākareyyuṃ saddakaṇṭakā hi bhikkhave jhānā vuttā mayā dasayime bhikkhave kaṇṭakā katame dasa pavivekārāmassa saṅgaṇikārāmatā kaṇṭako asubhanimittānuyogaṃ anuyuttassa subhanimittānuyogo kaṇṭako indriyesu guttadvārassa visūkadassanaṃ kaṇṭako brahmacariyassa mātugāmūpacāro kaṇṭako paṭhamassa jhānassa saddo kaṇṭako dutiyassa jhānassa vitakkavicārā kaṇṭakā tatiyassa jhānassa pīti kaṇṭakā catutthassa jhānassa assāsapassāsā kaṇṭakā saññāvedayitanirodhasamāpattiyā saññā ca vedanā ca kaṇṭakā rāgo kaṇṭako doso kaṇṭako akaṇṭakā bhikkhave viharatha [5]- akaṇṭakā nikaṇṭakā bhikkhave viharatha akaṇṭakā bhikkhave arahanto [6]- akaṇṭakā nikaṇṭakā bhikkhave arahantoti.