[81] Ekaṃ samayaṃ bhagavā campāyaṃ viharati gaggarāya pokkharaṇiyā tīre . athakho āyasmā vāhuno yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi ekamantaṃ nisinno kho āyasmā vāhuno bhagavantaṃ etadavoca katīhi nu kho bhante dhammehi tathāgato nissaṭo visaṃyutto vippamutto vimariyādikatena Cetasā viharatīti. {81.1} Dasahi kho vāhuna dhammehi tathāgato nissaṭo visaṃyutto vippamutto vimariyādikatena cetasā viharati katamehi dasahi rūpena kho vāhuna tathāgato nissaṭo visaṃyutto vippamutto vimariyādikatena cetasā viharati vedanāya kho vāhuna saññāya kho vāhuna saṅkhārehi kho vāhuna viññāṇena kho vāhuna jātiyā kho vāhuna jarāya kho vāhuna maraṇena kho vāhuna dukkhehi kho vāhuna kilesehi kho vāhuna tathāgato nissaṭo visaṃyutto vippamutto vimariyādikatena cetasā viharati seyyathāpi vāhuna uppalaṃ vā padumaṃ vā puṇḍarīkaṃ vā udake jātaṃ udake saṃvaḍḍhaṃ udakā accuggamma tiṭṭhati anupalittaṃ udakena evameva kho vāhuna imehi dasahi dhammehi tathāgato nissaṭo visaṃyutto vippamutto vimariyādikatena cetasā viharatīti.