[150] 4 Evamme sutaṃ . ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme . tena kho pana samayena sāvatthiyaṃ manussā yebhuyyena kāmesu sattā honti rattā giddhā gadhitā mucchitā ajjhopannā andhikatā sammattakajātā kāmesu viharanti . atha kho bhagavā pubbaṇhasamayaṃ nivāsetvā pattacīvaramādāya sāvatthiyaṃ piṇḍāya pāvisi . addasā kho bhagavā te sāvatthiyaṃ manusse yebhuyyena kāmesu satte giddhe gadhite ajjhopanne andhikate sammattakajāte kāmesu viharante . atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi kāmandhā jālasañchannā taṇhāchadanacchāditā pamattabandhunā bandhā macchāva kummināmukhe jarāmaraṇaṃ gacchanti vaccho khīrapakova mātaranti. Catutthaṃ.