[155] 9 Evamme sutaṃ. Ekaṃ samayaṃ bhagavā mallesu cārikañcaramāno mahatā bhikkhusaṅghena saddhiṃ yena thūnaṃ nāma mallānaṃ brāhmaṇagāmo tadavasari . assosuṃ kho thūneyyakā brāhmaṇagahapatikā samaṇo khalu bho gotamo sakyaputto sakyakulā pabbajito mallesu cārikañcaramāno mahatā bhikkhusaṅghena saddhiṃ thūnaṃ anuppattoti udapānaṃ tiṇassa ca bhusassa ca yāva mukhato pūresuṃ mā muṇḍakā samaṇakā pānīyaṃ adaṃsūti .

[156] Atha kho bhagavā maggā okkamma yena aññataraṃ rukkhamūlaṃ tenupasaṅkami upasaṅkamitvā paññatte āsane nisīdi . Nisajja kho bhagavā āyasmantaṃ ānandaṃ āmantesi iṅgha me tvaṃ ānanda etasmā udapānā pānīyaṃ āharāti . evaṃ vutte āyasmā ānando bhagavantaṃ etadavoca idāni so bhante udapāno thūneyyakehi brāhmaṇagahapatikehi tiṇassa ca bhusassa ca yāva mukhato pūrito mā muṇḍakā samaṇakā pānīyaṃ adaṃsūti . dutiyampi kho bhagavā āyasmantaṃ ānandaṃ āmantesi iṅgha me tvaṃ ānanda etasmā udapānā pānīyaṃ āharāti . dutiyampi kho āyasmā ānando bhagavantaṃ etadavoca idāni so bhante udapāno thūneyyakehi Brāhmaṇagahapatikehi tiṇassa ca bhusassa ca yāva mukhato pūrito mā te muṇḍakā samaṇakā pānīyaṃ adaṃsūti . tatiyampi kho bhagavā āyasmantaṃ ānandaṃ āmantesi iṅgha me tvaṃ ānanda etasmā udapānā pānīyaṃ āharāti . evaṃ bhanteti kho āyasmā ānando bhagavato paṭissutvā pattaṃ gahetvā yena so udapāno tenupasaṅkami . Atha kho udapāno āyasmante ānande upasaṅkamante sabbantaṃ tiṇañca bhusañca mukhato ovamitvā acchassa udakassa anāvilassa vippasannassa yāva mukhato pūrito visandanto maññe aṭṭhāsi. {156.1} Atha kho āyasmato ānandassa etadahosi acchariyaṃ vata bho abbhūtaṃ vata bho tathāgatassa mahiddhikatā mahānubhāvakatā ayañhi so udapāno mayi upasaṅkamante sabbantaṃ tiṇañca bhusañca mukhato ovamitvā acchassa udakassa anāvilassa vippasannassa yāva mukhato pūrito visandanto maññe ṭhitoti . pattena pānīyaṃ ādāya yena bhagavā tenupasaṅkami upasaṅkamitvā bhagavantaṃ etadavoca acchariyaṃ bhante abbhūtaṃ bhante tathāgatassa mahiddhikatā mahānubhāvakatā ayañhi so bhante udapāno mayi upasaṅkamante sabbantaṃ tiṇañca bhusañca mukhato ovamitvā acchassa udakassa anāvilassa vippasannassa yāva mukhato pūrito visandanto maññe aṭṭhāsi pīvatu bhagavā pānīyaṃ pīvatu sugato pānīyanti . atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi Kiṃ kayirā udapānena āpā ce sabbadā siyuṃ taṇhāya mūlato chetvā kissa pariyesanañcareti. Navamaṃ.