[215] 10 Vuttaṃ hetaṃ bhagavatā vuttamarahatāti me sutaṃ dvīhi bhikkhave dhammehi samannāgato bhikkhu diṭṭheva dhamme sukhasomanassabahulo viharati yoniso āraddho hoti āsavānaṃ khayāyāti katamehi dvīhi saṃvejanīyesu ṭhānesu saṃvejanena saṃvegassa ca yoniso padhānena imehi kho bhikkhave dvīhi dhammehi samannāgato bhikkhu diṭṭheva dhamme sukhasomanassabahulo viharati yoniso āraddho hoti āsavānaṃ khayāyāti. Etamatthaṃ bhagavā avoca. Tatthetaṃ iti vuccati saṃvejanīyesu ṭhānesu saṃvijjetheva paṇḍito Ātāpī nipako bhikkhu paññāya samavekkhiya evaṃ vihārī ātāpī santavutti anuddhato cetosamathamanuyutto khayaṃ dukkhassa pāpuṇeti. Ayampi attho vutto bhagavatā iti me sutanti. Dasamaṃ. Vaggo paṭhamo. Tassuddānaṃ dveme bhikkhu tapanīyā tapanīyā paratthehi ātāpī na kuhanā ca somanassena te dasāti. --------