[269] 10 Tīhi bhikkhave asaddhammehi abhibhūto pariyādinnacitto devadatto āpāyiko nerayiko kappaṭṭho atekiccho katamehi tīhi pāpicchatāya bhikkhave abhibhūto pariyādinnacitto devadatto āpāyiko nerayiko kappaṭṭho atekiccho . pāpamittatāya bhikkhave abhibhūto pariyādinnacitto devadatto āpāyiko nerayiko kappaṭṭho atekiccho . sati kho pana uttariṃ karaṇīye oramattakena visesādhigamena ca antarā vosānaṃ āpādi . Imehi kho bhikkhave tīhi asaddhammehi abhibhūto pariyādinnacitto devadatto āpāyiko Nerayiko kappaṭṭho atekicchoti. Mā jātu koci lokasmiṃ pāpiccho upapajjatha tadimināpi jānātha pāpicchānaṃ yathā gati. Paṇḍitoti samaññāto bhāvitattoti sammato jalaṃ va yasasā atthā devadattoti me sutaṃ. So pamādamanuciṇṇo āsajja naṃ tathāgataṃ avīcinirayaṃ patto catudvāraṃ bhayānakaṃ. Aduṭṭhassa hi yo dubbhe pāpakammaṃ akubbato tameva pāpaṃ phusseti duṭṭhacittaṃ anādaraṃ. Samuddaṃ visakumbhena yo maññeyya padūsituṃ na so tena padūseyya tasmā hi udadhī mahā. Evametaṃ tathāgataṃ yo vādena vihiṃsati sammaggataṃ santacittaṃ vādo tamhi na rūhati. Tādisaṃ mittaṃ kubbetha tañca seveyya paṇḍito yassa maggānugo bhikkhu khayaṃ dukkhassa pāpuṇeti. Ayampi attho vutto bhagavatā iti me sutanti. Dasamaṃ. Vaggo catuttho. Tassuddānaṃ vitakka sakkāra sadda cavamāna loke asubhaṃ dhammaṃ andhakāra malaṃ devadattena dasāti.