[272] 3 Saṅghāṭikaṇṇe cepi bhikkhave bhikkhu gahetvā piṭṭhito piṭṭhito anubandho assa pāde pādaṃ nikkhipanto so ca hoti abhijjhālu kāmesu tibbasārāgo byāpannacitto paduṭṭha- manasaṅkappo muṭṭhassati asampajāno asamāhito vibbhantacitto pākatindriyo atha kho so ārakā va mayhaṃ ahañca tassa . Taṃ kissa hetu dhammaṃ hi so bhikkhave bhikkhu na passati dhammaṃ Apassanto maṃ na passati yojanasate cepi so bhikkhave bhikkhu vihareyya so ca hoti anabhijjhālu kāmesu na tibbasārāgo abyāpannacitto appaduṭṭhamanasaṅkappo upaṭṭhitasati sampajāno samāhito ekaggacitto saṃvutindriyo atha kho so santikeva mayhaṃ ahañca tassa . taṃ kissa hetu dhammaṃ hi so bhikkhave bhikkhu passati dhammaṃ passanto maṃ passatīti. Anubandhopi ce assa mahiccho va vighātavā ejānugo anejassa nibbutassa anibbuto giddho so vītagedhassa passa yāvañca ārakā. Yo ca dhammamabhiññāya dhammamaññāya paṇḍito rahadova nivāto ca anejo vūpasammati anejo so anejassa nibbutassa ca nibbuto agiddho vītagedhassa passa yāvañca santiketi. Tatiyaṃ.