[273] 4 Tayome bhikkhave aggī katame tayo rāgaggi dosaggi mohaggi. Ime kho bhikkhave tayo aggīti. Rāgaggi dahati macce ratte kāmesu mucchite dosaggi pana byāpanne nare pāṇātipātino mohaggi pana sammūḷhe ariyadhamme akovide. Ete aggī ajānantā sakkāyābhiratā pajā te vaḍḍhayanti nirayaṃ tiracchānañca yoniyo Asuraṃ pittivisayañca amuttā mārabandhanā. Ye ca rattindivā yuttā sammāsambuddhasāsane te nibbāpenti rāgaggiṃ niccaṃ asubhasaññino dosaggiṃ pana mettāya nibbāpenti naruttamā mohaggiṃ pana paññāya yāyaṃ nibbedhagāminī. Te nibbāpetvā nipakā rattindivamatanditā asesaṃ parinibbanti asesaṃ dukkhamajjhaguṃ . Ariyaddasā vedaguno sammadaññāya paṇḍitā jātikkhayamabhiññāya nāgacchanti punabbhavanti. Catutthaṃ.