[321] |321.700| 6 Dhammacariyaṃ brahmacariyaṃ etadāhu vasuttamaṃ pabbajitopi ce hoti agārasmā anagāriyaṃ. |321.701| So ce mukharajātiko vihesābhirato migo Jīvitaṃ tassa pāpiyo rajaṃ vaḍḍheti attano. |321.702| Kalahābhirato bhikkhu mohadhammena āvuto akkhātampi na jānāti dhammaṃ buddhena desitaṃ. |321.703| Vihesaṃ bhāvitattānaṃ avijjāya purakkhato saṅkilesaṃ na jānāti maggaṃ nirayagāminaṃ |321.704| vinipātaṃ samāpanno gabbhā gabbhaṃ tamā tamaṃ sa ve tādisako bhikkhu pecca dukkhaṃ nigacchati. |321.705| Gūdhakūpo yathā assa sampuṇṇo gaṇavassiko yo ca evarūpo assa dubbisodho hi saṅgaṇo. |321.706| Yaṃ evarūpaṃ jānātha bhikkhavo gehanissitaṃ pāpicchaṃ pāpasaṅkappaṃ pāpaācāragocaraṃ. |321.707| Sabbe samaggā hutvāna abhinibbijjiyātha naṃ karaṇḍaṃ va niddhamatha kasambuṃ avakassatha |321.708| tato palāse vāhetha assamaṇe samaṇamānine. Niddhamitvāna pāpicche pāpaācāragocare |321.709| suddhā suddhehi saṃvāsaṃ kappayavho patissatā tato samaggā nipakā dukkhassantaṃ karissathāti. Dhammacariyasuttaṃ chaṭṭhaṃ.