[364] 6 Evamme sutaṃ . ekaṃ samayaṃ bhagavā rājagahe viharati veḷuvane kalandakanivāpe . tena kho pana samayena sabhiyassa paribbājakassa purāṇasālohitāya devatāya pañhā udiṭṭhā honti yo te sabhiya samaṇo vā brāhmaṇo vā ime pañhe puṭṭho byākaroti tassa santike brahmacariyaṃ careyyāsīti. {364.1} Atha kho sabhiyo paribbājako tassā devatāya santike [1]- pañhe uggahetvā ye te samaṇabrāhmaṇā saṅghino gaṇino gaṇācariyā ñātā yasassino titthakarā sādhusammatā bahujanassa seyyathīdaṃ pūraṇo kassapo makkhali gosālo ajito kesakambalo pakuddho kaccāyano sañjayo veḷaṭṭhaputto nigantho nāṭaputto te upasaṅkamitvā te pañhe pucchati . te sabhiyena paribbājakena pañhe puṭṭhā na sampāyanti asampāyantā kopañca dosañca appaccayañca pātukaronti api ca sabhiyaṃ paribbājakaṃ paṭipucchanti. {364.2} Atha kho sabhiyassa paribbājakassa etadahosi ye kho te bhonto samaṇabrāhmaṇā saṅghino gaṇino gaṇācariyā ñātā yasassino titthakarā sādhusammatā bahujanassa seyyathīdaṃ pūraṇo kassapo .pe. nigantho nāṭaputto te mayā pañhe puṭṭhā na sampāyanti asampāyantā kopañca dosañca appaccayañca pātukaronti Api ca maññevettha paṭipucchanti yannūnāhaṃ hīnāyāvattitvā kāme paribhuñjeyyanti . atha kho sabhiyassa paribbājakassa etadahosi ayaṃ kho samaṇo gotamo saṅghī ceva gaṇī ca gaṇācariyo ñāto yasassī titthakaro sādhusammato bahujanassa . Yannūnāhaṃ samaṇaṃ gotamaṃ upasaṅkamitvā ime pañhe puccheyyanti. {364.3} Atha kho sabhiyassa paribbājakassa etadahosi ye kho te bhonto samaṇabrāhmaṇā jiṇṇā vuḍḍhā mahallakā addhagatā vayo anuppattā therā rattaññū cirapabbajitā saṅghino gaṇino gaṇācariyā ñātā yasassino titthakarā sādhusammatā bahujanassa seyyathīdaṃ pūraṇo kassapo .pe. nigantho nāṭaputto tepi mayā pañhe puṭṭhā na sampāyanti asampāyantā kopañca dosañca appaccayañca pātukaronti api ca maññevettha paṭipucchanti . Kiṃ pana me samaṇo gotamo ime pañhe puṭṭho byākarissati . Samaṇo hi gotamo daharo ceva jātiyā navo ca pabbajjāyāti. {364.4} Atha kho sabhiyassa paribbājakassa etadahosi samaṇo kho gotamo daharoti na uññātabbo na paribhotabbo daharopi ce samaṇo hoti so ca mahiddhiko hoti mahānubhāvo . yannūnāhaṃ samaṇaṃ gotamaṃ upasaṅkamitvā ime pañhe puccheyyanti.