[388] |388.1106| 11 Ānandajāte tidasagaṇe patīte sakkañca indaṃ sucivasane ca deve dussaṃ gahetvā atiriva thomayante asito isi addasa divāvihāre. |388.1107| Disvāna deve pamuditamane udagge cittiṃ karitvā idamavoca tattha kiṃ devasaṅgho atiriva kalyarūpo dussaṃ gahetvā ramayatha kiṃ paṭicca. |388.1108| Yadāpi āsi asurehi saṅgamo jayo surānaṃ asurā parājitā tadāpi netādiso lomahaṃsano kimabbhūtaṃ daṭṭhu marū pamoditā. |388.1109| Seḷenti gāyanti ca vādayanti bhujāni phoṭenti ca naccayanti ca Pucchāmi vohaṃ merumuddhavāsine dhunātha me saṃsayaṃ khippaṃ mārisā. |388.1110| So bodhisatto ratanavaro atulyo manussaloke hitasukhatāya jāto sakyāna gāme janapade lumbineyye tenamha tuṭṭhā atiriva kalyarūpā. |388.1111| So sabbasattuttamo aggapuggalo narāsabho sabbapajānamuttamo vattessati cakkaṃ isivhaye vane nadaṃva sīho balavā migābhibhū. |388.1112| Taṃ saddaṃ sutvā turitamavasarī so suddhodanassa (tada) bhavanaṃ upāvisi nisajja tattha idamavocāpi sakye kuhiṃ kumāro ahampi daṭṭhukāmo. |388.1113| Tato kumāraṃ jalitamiva suvaṇṇaṃ ukkāmukheva sukusalasampahaṭṭhaṃ daddallamānaṃ siriyā anomavaṇṇaṃ dassesu puttaṃ asitavhayassa sakyā. |388.1114| Disvā kumāraṃ sikhimiva pajjalantaṃ Tārāsabhaṃva nabhasigamaṃ visuddhaṃ suriyantapantaṃ sāradarivabbhamuttaṃ ānandajāto vipulamalattha pītiṃ. |388.1115| Anekasākhañca sahassamaṇḍalaṃ chattaṃ marū dhāreyyumantalikkhe suvaṇṇadaṇḍā vītipatanti cāmarā na dissare cāmarachattagāhakā. |388.1116| Disvā jaṭī kaṇhasirivhayo isi suvaṇṇanikkhaṃ viya paṇḍukambale setañca chattaṃ dhārayantamuddhani udaggacitto sumano paṭiggahe. |388.1117| Paṭiggahetvā pana sakyapuṅgavaṃ jigiṃsako lakkhaṇamantapāragū pasannacitto giramabbhudīrayi anuttarāyaṃ dipadānamuttamo. |388.1118| Athattano gamanamanussaranto akalyarūpo gaḷayati assukāni disvāna sakyā isimavocuṃ rudantaṃ no ce kumāre bhavissati antarāyo. |388.1119| Disvāna sakye isimavoca akalye Nāhaṃ kumāre ahitamanussarāmi na cāpi assa bhavissati antarāyo na orakāyaṃ adhimanasā bhavātha. |388.1120| Sambodhiyaggaṃ phusissatāyaṃ kumāro so dhammacakkaṃ paramavisuddhadassī vattessatāyaṃ bahujanahitānukampī vitthārikassa bhavissati brahmacariyaṃ. |388.1121| Mamañca āyu na ciramidhāvaseso athantarā me bhavissati kālakiriyā sohaṃ na sussaṃ asamadhurassa dhammaṃ tenamhi aṭṭo byasanagato aghāvī. |388.1122| So sākiyānaṃ vipulaṃ janetvāna pītiṃ antepuramhā niragamā brahmacārī so bhāgineyyaṃ sayaṃ anukampamāno samādapesi asamadhurassa dhamme |388.1123| buddhoti ghosaṃ yadi parato suṇāsi sambodhipatto vivarati dhammamaggaṃ gantvāna tattha sayaṃ paripucchamāno carassu tasmiṃ bhagavati brahmacariyaṃ. |388.1124| Tenānusiṭṭho hitamanena tādinā Anāgate paramavisuddhadassinā so nāḷako upacitapuññasañcayo jinaṃ patikkhaṃ parivasi rakkhitindriyo. |388.1125| Sutvāna ghosaṃ jinavaracakkavattane gantvāna disvā isinisabhaṃ pasanno moneyyaseṭṭhaṃ munivaraṃ apucchi samāgate asitavhayassa sāsaneti. Vatthukathā niṭṭhitā.