[430] |430.1497| 6 Eko ahaṃ sakka mahantamoghaṃ (iccāyasmā upasīvo) anissito no visahāmi tārituṃ ārammaṇaṃ brūhi samantacakkhu yaṃ nissito oghamimaṃ tareyya. |430.1498| Ākiñcaññaṃ pekkhamā no satimā (upasīvāti bhagavā) natthīti nissāya tarassu oghaṃ kāme pahāya virato kathāhi taṇhakkhayaṃ rattamahābhipassa. |430.1499| Sabbesu kāmesu yo vītarāgo (iccāyasmā upasīvo) ākiñcaññaṃ nissito hitvamaññaṃ saññāvimokkhe parame vimutto tiṭṭhe nu so tattha anānuvāyī . |430.1500| Sabbesu kāmesu yo vītarāgo (upasīvāti bhagavā) ākiñcaññaṃ nissito hitvamaññaṃ saññāvimokkhe parame vimutto tiṭṭheyya so tattha anānuvāyī |430.1501| tiṭṭhe ce so tattha anānuvāyī Pūgampi vassānaṃ samantacakkhu tattheva so sīti siyā vimutto bhavetha viññāṇaṃ tathāvidhassa. |430.1502| Acci yathā vātavegena khittaṃ (upasīvāti bhagavā) atthaṃ paleti na upeti saṅkhaṃ evaṃ munī nāmakāyā vimutto atthaṃ paleti na upeti saṅkhaṃ. |430.1503| Atthaṅgato so uda vā so natthi udāhu ve sassatiyā arogo tamme munī sādhu viyākarohi tathā hi te vidito esa dhammo. |430.1504| Atthaṅgatassa na pamāṇamatthi (upasīvāti bhagavā) yena naṃ vajju taṃ tassa natthi sabbesu dhammesu samūhatesu samūhatā vādapathāpi sabbeti. Upasīvamāṇavakapañhā chaṭṭhī. ---------