[44] 7 Evamme sutaṃ . ekaṃ samayaṃ bhagavā pāvāyaṃ viharati Ajakalāpake cetiye ajakalāpakassa yakkhassa bhavane . tena kho pana samayena bhagavā rattandhakāratimisāyaṃ abbhokāse nisinno hoti devo ca ekamekaṃ phusāyati . atha kho ajakalāpako yakkho bhagavato bhayaṃ chambhitattaṃ lomahaṃsaṃ uppādetukāmo yena bhagavā tenupasaṅkami upasaṅkamitvā bhagavato avidūre tikkhattuṃ akkulo pakkulo akkulapakkulikaṃ akāsi eso te samaṇa pisācoti. {44.1} Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi yadā sakesu dhammesu pāragū hoti brāhmaṇo atha evaṃ pisācañca pakkulañcātivattatīti . Sattamaṃ.