[132] 2 Evamme sutaṃ . ekaṃ samayaṃ bhagavā sāvatthiyaṃ viharati pubbārāme migāramātu pāsāde . tena kho pana samayena bhagavā sāyaṇhasamayaṃ paṭisallānā vuṭṭhito bahidvārakoṭṭhake nisinno hoti . atha kho rājā pasenadi kosalo yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . tena kho pana samayena satta ca jaṭilā satta ca niganthā satta ca acelā satta ca ekasāṭā satta ca paribbājakā parūḷhakacchanakhalomā khārīvividhamādāya bhagavato avidūre abhikkamanti . Addasā kho rājā pasenadi kosalo te satta ca jaṭile satta ca niganthe satta ca acele satta ca ekasāṭe satta ca Paribbājake parūḷhakacchanakhalome khārīvividhamādāya bhagavato avidūre abhikkamante disvāna uṭṭhāyāsanā ekaṃsaṃ uttarāsaṅgaṃ karitvā dakkhiṇajāṇumaṇḍalaṃ paṭhaviyaṃ nihantvā yena te satta ca jaṭilā satta ca niganthā satta ca acelā satta ca ekasāṭā satta ca paribbājakā tenañjalimpaṇāmetvā tikkhattuṃ nāmaṃ sāvesi rājāhaṃ bhante pasenadi kosalo rājāhaṃ bhante pasenadi kosaloti. {132.1} Atha kho rājā pasenadi kosalo acirapakkantesu tesu sattasu ca jaṭilesu sattasu ca niganthesu sattasu ca acelesu sattasu ca ekasāṭesu sattasu ca paribbājakesu yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . ekamantaṃ nisinno kho rājā pasenadi kosalo bhagavantaṃ etadavoca ye ca te bhante loke arahanto vā arahattamaggaṃ vā samāpannā etesaṃ aññataroti.

[133] Dujjānaṃ kho etaṃ mahārāja tayā gihinā kāmabhoginā puttasambādhasayanaṃ ajjhāvasantena kāsikacandanaṃ paccanubhontena mālāgandhavilepanaṃ dhārayantena jātarūparajataṃ sādiyantena ime vā arahanto ime vā arahattamaggaṃ samāpannāti . 1 saṃvāsena kho mahārāja sīlaṃ veditabbaṃ tañca kho dīghena addhunā na ittarena manasikarotā no amanasikarotā paññavatā no duppaññena . 2 Saṃvohārena kho mahārāja soceyyaṃ veditabbaṃ tañca kho dīghena Addhunā na ittarena manasikarotā no amanasikarotā paññavatā no duppaññena . 3 āpadāsu kho mahārāja thāmo veditabbo so ca kho dīghena addhunā na ittarena manasikarotā no amanasikarotā paññavatā no duppaññena . 4 sākacchāya kho mahārāja paññā veditabbā sā ca kho dīghena addhunā na ittarena mamasikarotā no amanasikarotā paññavatā no duppaññenāti.