[138] Bhūtapubbaṃ bhikkhave imissā yeva sāvatthiyā aññataro rājā ahosi . atha kho bhikkhave so rājā aññataraṃ purisaṃ āmantesi ehi tvaṃ ambho purisa yāvatikā sāvatthiyā jaccandhā te sabbe ekajjhaṃ sannipātehīti . evaṃ devāti kho bhikkhave so puriso tassa rañño paṭissutvā yāvatikā sāvatthiyā jaccandhā Te sabbe gahetvā yena so rājā tenupasaṅkami upasaṅkamitvā taṃ rājānaṃ etadavoca sannipātitā kho te deva yāvatikā sāvatthiyā jaccandhāti . tena hi bhaṇe jaccandhānaṃ hatthiṃ dassehīti . evaṃ devāti kho bhikkhave so puriso tassa rañño paṭissutvā jaccandhānaṃ hatthiṃ dassesi ekaccānaṃ jaccandhānaṃ hatthissa sīsaṃ dassesi ediso jaccandhā hatthīti . ekaccānaṃ [1]- hatthissa kaṇṇaṃ dassesi ediso jaccandhā hatthīti. {138.1} Ekaccānaṃ jaccandhānaṃ hatthissa dantaṃ dassesi ediso jaccandhā hatthīti . ekaccānaṃ jaccandhānaṃ hatthissa soṇḍaṃ dassesi ediso jaccandhā hatthīti . ekaccānaṃ jaccandhānaṃ hatthissa kāyaṃ dassesi ediso jaccandhā hatthīti . ekaccānaṃ hatthissa pādaṃ dassesi ediso jaccandhā hatthīti . ekaccānaṃ jaccandhānaṃ hatthissa piṭṭhiṃ dassesi ediso jaccandhā hatthīti . ekaccānaṃ jaccandhānaṃ hatthissa naṅguṭṭhaṃ dassesi ediso jaccandhā hatthīti . ekaccānaṃ jaccandhānaṃ hatthissa vāladhiṃ dassesi ediso jaccandhā hatthīti. {138.2} Atha kho bhikkhave so puriso jaccandhānaṃ hatthiṃ dassetvā yena so rājā tenupasaṅkami upasaṅkamitvā taṃ rājānaṃ etadavoca diṭṭho kho tehi deva jaccandhehi hatthī yassadāni kālaṃ maññathāti . Atha kho bhikkhave so rājā yena te jaccandhā tenupasaṅkami upasaṅkamitvā te jaccandhe etadavoca diṭṭho vo jaccandhā Hatthīti . evaṃ devāti . diṭṭho no hatthīti vadetha jaccandhā kīdiso hatthīti . yehi bhikkhave jaccandhehi hatthissa sīsaṃ diṭṭhaṃ ahosi te evamāhaṃsu ediso deva hatthī seyyathāpi kumbhoti . Yehi bhikkhave jaccandhehi hatthissa kaṇṇo diṭṭho ahosi te evamāhaṃsu ediso deva hatthī seyyathāpi suppoti . yehi bhikkhave jaccandhehi hatthissa danto diṭṭho ahosi te evamāhaṃsu ediso deva hatthī seyyathāpi phāloti . {138.3} Yehi bhikkhave jaccandhehi hatthissa soṇḍo diṭṭho ahosi te evamāhaṃsu ediso deva hatthī seyyathāpi naṅgalīsāti . Yehi bhikkhave jaccandhehi hatthissa kāyo diṭṭho ahosi te evamāhaṃsu ediso deva hatthī seyyathāpi koṭṭhoti . yehi bhikkhave jaccandhehi hatthissa pādo diṭṭho ahosi te evamāhaṃsu ediso deva hatthī seyyathāpi thūṇoti. {138.4} Yehi bhikkhave jaccandhehi hatthissa piṭṭhi diṭṭhā ahosi te evamāhaṃsu ediso deva hatthī seyyathāpi udukkhaloti . Yehi bhikkhave jaccandhehi hatthissa naṅguṭṭhaṃ diṭṭhaṃ ahosi te evamāhaṃsu ediso deva hatthī seyyathāpi musaloti . yehi bhikkhave jaccandhehi hatthissa vāladhi diṭṭho ahosi te evamāhaṃsu ediso deva hatthī seyyathāpi sammajjanīti . te ediso hatthī nediso hatthī nediso hatthī ediso hatthīti aññamaññaṃ muṭṭhīhi saṃyujjiṃsu . tena ca pana bhikkhave so rājā attamano ahosi . evameva kho bhikkhave Aññatitthiyā paribbājakā andhā acakkhukā [1]- atthaṃ na jānanti anatthaṃ na jānanti dhammaṃ na jānanti adhammaṃ na jānanti te atthaṃ ajānantā anatthaṃ ajānantā dhammaṃ ajānantā adhammaṃ ajānantā bhaṇḍanajātā kalahajātā vivādāpannā aññamaññaṃ mujasattīhi vitudantā viharanti ediso dhammo nediso dhammo nediso dhammo ediso dhammoti . atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi imesu kira sajjanti eke samaṇabrāhmaṇā viggayha naṃ vivadanti janā ekaṅgadassinoti. Catutthaṃ.