[297] 4 Evamme sutaṃ . ekaṃ samayaṃ bhagavā magadhesu viharati dakkhiṇāgirismiṃ ekanāḷāyaṃ brāhmaṇagāme . tena kho pana samayena kasibhāradvājassa brāhmaṇassa pañcamattāni naṅgalasatāni payuttāni honti vappakāle . atha kho bhagavā pubbaṇhasamayaṃ nivāsetvā pattacīvaramādāya yena kasibhāradvājassa brāhmaṇassa kammanto tenupasaṅkami . tena kho pana samayena kasibhāradvājassa brāhmaṇassa parivesanā vattati. {297.1} Atha kho bhagavā yena parivesanā tenupasaṅkami upasaṅkamitvā ekamantaṃ aṭṭhāsi . addasā kho kasibhāradvājo brāhmaṇo bhagavantaṃ piṇḍāya ṭhitaṃ disvāna bhagavantaṃ etadavoca ahaṃ kho samaṇa kasāmi ca vappāmi ca kasitvā ca vappitvā ca bhuñjāmi . tvampi samaṇa kasassu ca vappassu ca kasitvā ca vappitvā ca bhuñjāhīti . ahampi kho brāhmaṇa kasāmi ca vappāmi ca kasitvā ca vappitvā ca bhuñjāmīti . na kho pana samaṇa passāma bhoto gotamassa yugaṃ vā naṅgalaṃ vā phālaṃ vā pācanaṃ vā balibaddhe vā atha ca pana bhavaṃ gotamo evamāha ahampi kho brāhmaṇa kasāmi ca Vappāmi ca kasitvā ca vappitvā ca bhuñjāmīti . atha kho kasibhāradvājo brāhmaṇo bhagavantaṃ gāthāya ajjhabhāsi

[298] |298.499| Kassako paṭijānāsi na ca passāma te kasiṃ kasiṃ no pucchito brūhi yathā jānemu te kasiṃ. |298.500| Saddhā bījaṃ tapo vuṭṭhi paññā me yuganaṅgalaṃ hirī īsā mano yottaṃ sati me phālapācanaṃ. |298.501| Kāyagutto vacīgutto āhāre udare yato saccaṃ karomi niddhānaṃ soraccamme pamocanaṃ. |298.502| Viriyaṃ me dhuradhorayhaṃ yogakkhemādhivāhanaṃ gacchati anivattantaṃ yattha gantvā na socati. |298.503| Evaṃ me sā kasi kaṭṭhā sā hoti amatapphalā etaṃ kasiṃ kasitvāna sabbadukkhā pamuccatīti.

[299] Atha kho kasibhāradvājo brāhmaṇo mahatiyā kaṃsapātiyā pāyāsaṃ vaḍḍhetvā bhagavato upanāmesi bhuñjatu bhavaṃ gotamo pāyāsaṃ kassako bhavaṃ yañhi bhavaṃ gotamo amatapphalaṃ kasiṃ kasatīti. |299.504| Gāthābhigītamme abhojaneyyaṃ sampassataṃ brāhmaṇa nesa dhammo gāthābhigītaṃ panudanti buddhā dhamme satī brāhmaṇa vuttiresā.